Македонското Министерство за внатрешни работи и граничната полиција будно ги следат случувањата во Сирија и се подготвени да спречат влез на евентуален нов бран на бегалци и мигранти, изјави техничкиот министер Наќе Чулев на новинарско прашање за заканите од Турција дека повеќе нема да ги запира бегалците да се упатуваат кон Европа.
„Ние будно го следиме процесот и сме многу подобро подготвени, и материјално-технички и кадровски за попречување на влез на нов бран емигранти“,
изјави Чулев.
Во моментов закани за нов бегалски бран нема, вели дополнителната министерка за внатрешни работи Славјанка Петровска, која посочи дека на македонската полиција на јужната граница и помагаат колеги од други странски држави, а доколку има потреба ќе се зајакнат капацитетите.
„Ја следиме будно ситуацијата во Турција и согласно тоа ќе донесеме одлука за распоредување на дополнителни сили и од македонската полиција. Сега засега, во моментов освен овие најави посериозна закана немаме, но будно ја следиме, бидејќи сме свесни дека тоа може да биде проблем во државата“,
Петровска.
Во меѓувреме, поради насобрани бегалци и мигранти на турската страна, Грција го затвори граничниот премин „Кастањес“ со Турција кај Еврос, јави МИА повикувајќи се на вест на грчката новинска агенција АНА-МПА.
Сепак, Европската Унија и Агенцијата на Обединети нации за бегалци засега потенцираат дека не се известени за промените на турската политика кон сириските бегалци и дека очекуваат Анкара да ги почитува обврските што ги има за контрола на протокот на мигранти во Европска Унија.
Заканата на Турција, пак, доаѓа по вчерашниот напад врз нејзините сили во Идлиб, при што загинаа повеќе од 30 турски војници. На барање на Турција денеска треба да се одржи и вонреден состанок на Северноатлантскиот совет.
Поврзани вести:
Турција се закани дека ќе ги пушти сириските бегалци кон Балканот и Западна Европа
По заканите дека ќе ги пушта бегалците: Грција го затвори граничниот премин со Турција кај Еврос