Во телефонскиот разговор што двајцата министри го имале попладнево била договорена работна средба помеѓу нив која ќе се одржи на маргините на Генералното собрание на Обединетите нации во Њујорк
С Македонија како земја членка на НАТО останува посветена на поддршката на Украина во одбрана на нејзината независност и територијален интегритет. Ова го истакнал министерот за надворешни работи и надворешна трговија Тимчо Муцунски, кој денеска попладне имал телефонски разговор со својот украински колега Андриј Сибиха.
Реафирмирајќи ја нашата поддршка за Украина, Мицунски, како што соопштија од Министерството, потенцирал дека земјава ќе продолжи со обезбедување силна политичка и практична помош за Киев.
„За време на разговорот, Муцунски ја реафирмира нашата поддршка за Украина, која ќе продолжи и во иднина. Тој потенцира дека, како земја членка на НАТО, остануваме посветени на обезбедување силна политичка и практична помош за Украина додека таа ја брани својата независност и територијалниот интегритет“,
се наведува во соопштението од Министерството за надворешни работи и надворешна трговија.
Во телефонскиот разговор Муцунски и Сибиха разговарале и за актуелни билатерални прашања, околу кои и двете страни изразиле уверување дека добрата соработка меѓу двете земји ќе продолжи и во наредниот период.
Во таа насока, како што се наведува, била договорена и работна средба помеѓу двајцата министри која ќе се одржи на маргините на Генералното собрание на Обединетите нации во Њујорк.
На крајот на август, министерот за одбрана Владо Мисајловски најави дека наскоро на седница на Влада треба да се најде новото барање за помош што Украина го испратила до земјава.
За разгледување на барањето на седница на Владата и донесување конечна одлука, како што кажа Мисајловски на 30 август, се чека сите министри да добијат безбедносни сертификати бидејќи станува збор за информации од доверлив карактер.
С Македонија досега во неколку транши достави помош за Украина, како во воена опрема, така и во хуманитарна помош.