„Апсолутно сметаме дека таквиот пристап е штетен, токму поради фактот што ние не сме ја блокирале Бугарија, туку Бугарија нè блокираше нас. Мислам дека нашиот пристап треба да е крајно конструктивен и внимателен бидејќи со секое заострување на реториката може да ги затвориме и тие врати што сметаме дека можат да се отворат после изборите“, вели министерот за европски прашања
Воопшто не е инвестиција во иден дијалог со Бугарија, напротив – на тој начин само се помага во нивниот предизборен натпревар, да станеме како држава клучна тема на изборите во Бугарија, вели министерот за европски прашања Орхан Муртезани во интервју за „360 степени“ на МРТ 1, за изјавата на министерот за транспорт Александар Николоски во која за лидерот на ГЕРБ, Бојко Борисов, рече дека е политичар обвинуван за корупција, кој спие на пачки злато и евра во неговата спална.
На новинарска забелешка дека од коалицијата „Вреди“ немаше оградување од изјавата на Николоски, Муртезани вели:
„Апсолутно сметаме дека таквиот пристап е штетен, токму поради фактот што ние не сме ја блокирале Бугарија, туку Бугарија нè блокираше нас. Мислам дека нашиот пристап треба да е крајно конструктивен и внимателен бидејќи со секое заострување на реториката може да ги затвориме и тие врати што сметаме дека можат да се отворат после изборите“.
На прашање зошто сметаат дека уставни измени со одложено дејство носат гаранција, односно предвидливост на процесот, со оглед на тоа што Преговарачката рамка, а со тоа и содржината на преговорите, ќе останат исти, Муртезани одговара:
„Ние сега имаме вето и блокиран е процесот на отворање преговори. На тој начин ние мислиме дека ќе го одблокираме процесот. Бугарија, од другата страна, ќе има можност за вето пред ратификација на пристапниот договор, а ние ќе одиме напред. Централниот фокус на овој предолг е да се одблокира отпочнувањето на преговорите, со тоа што ние ќе имаме две, три, пет години пред нас да ги спроведеме реформите и да одиме напред во евроинтеграцијата, а од друга страна Бугарија би имала право на вето доколку правата на бугарската заедница не се материјализираат во нашите закони и Устав“.