Владата на денешната седница, меѓу другото, го задолжила Министерството за европски прашања да подготви нова одлука за воспоставување структура за преговори за пристапување на Република Северна Македонија во Европската Унија
Министерот за европски прашања Орхан Муртезани е назначен за главен преговарач со Европската Унија (ЕУ), информираа попладнево од ресорното министерство. Одлуката е донесена на денешната владина седница.
За заменик на главниот преговарач е назначена заменик-министерката за европски прашања Викторија Трајков.
На владината седница, како што додаваат од ресорот со кој раководи Муртезани, Министерството за европски прашања е задолжено да подготви нова одлука за воспоставување на структура за преговори за пристапување на Република Северна Македонија во Европската Унија.
Во објава на Фејсбук министерот порача оти за него е привилегија да работи за европската иднина и стандард на живеење рамо до рамо со стратегиските партнери.
„На денешната седница на Владата бев назначен за главен преговарач со Европската Унија, задача која јас ја земам со голема одговорност и чест. Патот може да ни е долг, но дестинацијата ни е конечна. Ние сме ЕУ!“,
пишува Муртезани на Фејсбук.