На изборниот процес во соседната држава, според министерот за европски прашања Орхан Муртезани, се гледа како на важен чекор на билатералните односи преку продлабочување на заемната доверба
Министерот за европски прашања Орхан Муртезани денеска остварил средба со бугарскиот амбасадор во земјава Жељазко Радуков изразувајќи надеж за успешни парламентарни избори во Бугарија.
На изборниот процес во соседната држава, според министерот, се гледа како на важен чекор на билатералните односи преку продлабочување на заемната доверба.
Муртезани и Радуков ја истакнале важноста од консолидација на довербата и соработката, особено во контекст на евроинтегративниот процес, на кој, како што посочиле, треба да се гледа како на заеднички стратегиски приоритет.
Во однос на евроинтегративниот процес на земјава, министерот Муртезани ја истакнал посветеноста на Владата за постигнување достоинствено решение во контекст на исполнување на потребните услови за забрзување на процесот на полноправно членство на С Македонија во ЕУ.
„Во разговорот бил потенциран и ангажманот за конструктивен и транспарентен дијалог со цел унапредување на добрососедските односи и решавање на заедничките предизвици во духот на соработка и партнерство“,
информираат од Министерството за европски прашања.
Министерот за европски прашања на почетокот на месецов изјави дека Владата работи на изнаоѓање на решенија во врска со евроинтеграциите на земјава, но оти нема да бидат објавени пред изборите во соседна Бугарија.