Првиот човек на „Алкалоид“, Живко Мукаетов упати смирувачка порака до македонските граѓани. Во интервју за 24 вести, тој најави дека компанијата која ја предводи го пренаменила делот од производството на козметика и од денеска стартува со линија за производство на дезинфециенси.
„Ги пренаменивме машините за производство на шампони. Од денеска почна производството на дезинфециенси, односно најбараниот продукт Дезитнал. Ќе се работи и во сабота и во недела и од понеделник, целата ситуација со дезинфециенсите на територијата на нашата држава очекувам да се стабилизира“,
изјави Мукаетов.
Тој укажа дека дезинфециенсите не биле сериозен дел од портфолиото на Алкалоид и дека биле произведувани само како дополна на програмата за лекови.
„Сосема други компании го креираа пазарот на дезинфециенси во змејава. За жал, тие одеднаш, веројатно по налог на државите од каде доаѓаат и забраната за извоз на нивни производи, немаа можност да ги покријат потребите кои нагло се зголемија. Се создаде една голема дупка на пазарот, а таа предизвика нервоза кај македонските граѓани, која е за разбирање. Ние се вклучивме, но во овој период најважно беше да одговориме на потребите и барањата на државните институции“,
изјави Мукаетов.
Според него, ваков шок, во кој за само за две три недели, целиот свет се урива како кула од карти е незабележан, посебно ако, како што вели, од една страна се има предвид каде е отидена технологијата и се останато, а од друга страна, како се случува овој неверојатен феномен.
„Колку за компарација, ние во текот на месец март произведовме дезинфециенси колку во 2017, 2018 и 2019 година заедно“,
вели генералниот директор на Алкалоид.
Тој нагласи дека во однос на лековите, граѓаните треба да бидат спокојни, бидејќи компанијата има сериозни залихи.
„Значи, од аспект на лекови, дезинфециенси, раствори за дијализа и инфузиони раствори, тоа се четири групи производи кои Алкалоид ги прозиведува, со сигурност можам да кажам дека нив ќе го има. Ние сме домаќинска компанија и имаме доволно залихи. Но, би сакал да апелирам до граѓаните да не трупаат непотребни залихи, бидејќи имаме доволно. Да покажеме емпатија и солидарност и да купуваме толку колку што ни треба, за навистина да има за сите“,
е пораката на Мукаетов .
Во однос на цените, Мукаетов повтори дека сите производи од гамата на Алкалоид од почетокот на кризата се со намалени цени.
„Се што е производ што не е регулиран од страна на државата, лековите на рецепт се регулирани од државата, се останато што во моментот и ургентно им е потребно на нашите граѓани, тоа се кафетин, аналгин, прокулин, бетадине, витамините, ацерола, ад перлите, значи се што е од тоа портфолио, плус и сите дезинфециенси сметавме дека е добро да ги намалиме цените, како гест со кој ќе покажеме дека сме партнери со нашиот народ, затоа што Алкалоид е дел од оваа држава, компанија која постои 84 години и која секогаш била коректен партнер на македонското здравство, на македонската фармација и здрав столб на македонската економија“,
потенцира првиот човек на Алкалоид.
ДА ИМ СЕ ПОМОГНЕ НА МАЛИТЕ И СРЕДНИ КОМПАНИИ, А ВЛАДАТА ДА ГИ ВЕДНАШ ДА ПОБАРА СВЕЖИ ПАРИ НА СВЕТСКИТЕ ПАЗАРИ
Мукаетов говореше и за предизвиците со кои ќе се соочи македонската економија и побара постигнување единство меѓу политичките субјекти за полесно да се надмине кризата која се очекува.
„Потребно е по секоја цена да им се помогне на малите и средни претпријатија чиј бизнис е невозможно да функционира во една ваква криза. На тие компании, односно на нивните вработени треба да им се најде форма да останат на работа. Тоа ќе го чини буџетот на државата, но апсолутно мора да им се даде ветер во грб на тие компании. А, во однос на ликвидноста, мора што побрзо Владата да ги донесе мерките за да може што побргу да побара средства од разни потенцијални извори на тие средства. Парите, од аспект на каматни стапки во светот се евтини, но побарувачката за свежи пари нагло ќе расте и расте од ден на ден и секој ден доцнење, од аспект на аплицирање за финансирање од разни меѓународни извори може да доведе да не може така лесно да се соберат тие средства од надвор. Во целиот свет следи еден турбулентен период, има цели дејности кои во моментов не се во состојба да функционираат. Треба да се покаже единство, емпатија и солидарност меѓу економските ентитети, врз основа на една заедничка стратегија која ќе покаже каде и како да се преброди овој период кој е една голема непознаница“,
смета Мукаетов.
Тој најави дека наспроти компаниите кои отпуштаат вработени, поради мобилност и зголемен ангажман, Алкалоид од понеделник ќе вработи нови 40 лица.