Не користете возила ако немате преголема потреба, возете се повеќе лица со еден автомобил наместо да одите со повеќе автомобили, користете јавен превоз, не горете лакирани и обоени отпадоци, гума итн., се дел од препораките на Министерството за животна средина за претстојниот празничен период
Поради аерозагадувањето, здравствените власти препорачуваат децата, старите, хронично болните и други ранливи категории да го ограничат движења и активности на отворен простор во загадените зони на Скопје
Прекинат е прагот на алармирање во Скопје поради аерозагадувањето, соопшти Министерството за животна средина и просторно планирање (МЖСПП), кое издаде и препораки до граѓаните за наредните денови бидејќи временските услови навестуваат дека повторно може да има зголемени концентрации на ПМ 10 честички во воздухот.
„Согласно податоците од Државниот мониторинг систем за квалитет на амбиенталниот воздух на ден 26.12.2022, среднодневните концентрации на ПМ10 суспендираните честички се под дефинираниот праг на алармирање од 150 мg/m3, и епизодата од два последователни дена е прекината во Скопје и престануваат да важат препораките и мерките за надминат праг на алармирање“,
велат од Министерството.
Што се однесува до наредните денови, можното зголемување на аерозагадувањето тие го предвидуваат бидејќи се очекува стабилна временска состојба. Препораките кои ги издаваат од МЖСПП до граѓаните за време на наредниот празничен период се:
- Да не се користат возила без поголема потреба;
- Повеќе лица да се возат со едно возило во исто време;
- Да се користи јавниот превоз;
- Да не се користи за затоплување на простории прегорено отпадно масло, лакирани или обоени отпадоци од дрво и мебел, стиропор, ПЕТ амбалажа, парчиња гума и каков било синтетички материјал;
- Правилно да се користат печките за дрва.
Од Министерството за здравство и Институтот за јавно здравје препорачуваат најранливата популација (деца, стари лица, болни од хронични болести на белодробниот и срцевиот садовен систем, со посебен ризик за болните од белодробна астма) да го ограничат движења и активности на отворен простор во загадените зони на градот.