Критикувајќи го Зеленски, американскиот претседател синоќа изјави дека и просечен преговарач можел да направи спогодба пред неколку години без загуба на голема територија
Истовремено Трамп повтори едно од клучните барања на Москва, а кое се однесува на одржување претседателски избори во Украина, со што го зголеми притисокот врз Зеленски во врска со ова прашање
Американскиот претседател Доналд Трамп синоќа упати критики до својот украински колега Володимир Зеленски во врска со неговите забелешки дека бил изоставен од разговорите меѓу САД и Русија за ставање крај на војната во Украина.
Тој, говорејќи во Флорида вчеравечер, рече дека Украина можела да направи договор за да се избегне војната, но не го сторила тоа, а дел од неговите забелешки британски „Гардијан“ ги толкува како обвинувања кон Киев дека тој е виновен за инвазијата на Москва пред речиси три години.
Претседателот на САД во обраќањето кажа дека е посигурен оти разговорите меѓу САД и Русија што одржаа во Саудиска Арабија може да доведат до постигнување договор за завршување на војната.
„Многу сум разочаран, слушам дека се вознемирени поради тоа што немало место за нив (на разговорите). Денес слушнав: ‘Не бевме поканети’. Па вие сте таму три години… Никогаш не требаше да ја започнете (војната). Можевте да направите договор“,
рече Трамп пред новинарите во неговото одморалиште Мар-а-Лаго на Флорида прашан за украинската реакција по разговорите меѓу високите претставници на САД и Русија во Ријад.
Критикувајќи го Зеленски, американскиот претседател рече дека и просечен преговарач можел да направи спогодба пред неколку години без загуба на голема територија.
Истовремено Трамп повтори едно од клучните барања на Москва, а кое се однесува на одржување на претседателски избори во Украина, со што го зголеми притисокот врз Зеленски околу ова прашање.
Зеленски претходно вчера ги критикуваше американско-руските разговори велејќи дека напорите за завршување на војната мора да бидат фер и да ги вклучат Украина и европските земји.
„Се одржуваат разговори меѓу претставници на Русија и претставници на Соединетите Американски Држави. За Украина, без Украина“,
рече тој.
Според „Гардијан“, ваквите наводи на украинскиот претседател како да го налутија Трамп, кој возврати со серија вербални напади кон Зеленски.
Прашан дали САД ќе ги поддржат барањата на Русија да го принудат Зеленски да одржи нови избори како дел од каков било договор, Трамп рече:
„Тие сакаат место на масата, но може да се каже… зарем народот на Украина нема да има збор? Помина долго време откако немало избори таму… Во суштина, имаме воена состојба во Украина, каде што лидерот во Украина, мислам, мразам да го кажам тоа, но тој е се намален рејтинг, а земјата е во урнатини“,
Од друга страна, Зеленски во интервју за германската телевизија АРД емитувано вечера ја бранеше својата популарност наведувајќи дека тој е претседател на Украина затоа што 73 отсто од граѓаните на земјата гласале за него на последните избори.
„И денес сум претседател затоа што мнозинството во мојата земја ме поддржува. Јас сум патриот, исто како и луѓето што ја бранат нашата земја. Секако дека Русија сака да се ослободи од мене. Можеби веќе не физички, како на почетокот на војната, но политички, да . И тоа е апсолутно разбирливо бидејќи јас сум многу непријатна личност за Путин“,
рече Зеленски.
Инаку, тој беше избран во 2019 година со мандат од пет години, но сè уште е на функцијата бидејќи Украина е под воена состојба.
Во меѓувреме кај европските лидери постојат стравувања дека Трамп ѝ дава премногу отстапки на Русија во неговите чекори за доаѓање до договор за ставање крај на војната во Украина што беше едно неговите ветувања уште пред да ја преземе функцијата во Белата куќа.
Коментирајќи ги разговорите во Ријад, американскиот претседател рече дека тие биле многу добри и оти Русија сака да направи нешто за, како што рече, запирање на дивјачкото варварство.
„Мислам дека ја имам моќта да ја завршам оваа војна и мислам дека оди многу добро“,
рече Трамп.
Американскиот лидер додаде дека се согласува со распоредување европски мировници во Украина доколку се постигне договор за ставање крај на војната.
„Ако тие сакаат да го направат тоа, тоа е одлично, јас сум за… Знам дека Франција е подготвена да го стори тоа и мислам дека тоа е прекрасен гест“,
додаде Трамп велејќи дека Велика Британија дала слична понуда.
Според него, САД не мора да учествуваат во мировната мисија бидејќи, како што кажа, географски тие се многу далеку.
Коментарите на Трамп уследија откако рускиот министер за надворешни работи Сергеј Лавров рече дека неговата земја нема да прифати мировни сили на НАТО во Украина, според каков било мировен договор.
Трамп го изненади светот минатата недела кога објави дека разговарал со Путин и дека двајцата се договориле да започнат мировни преговори за ставање крај на војната во Украина, како и дека се подготвени за средби во Москва и Вашингтон.
Американскиот претседател тогаш рече дека првиот состанок меѓу него и Путин, најверојатно, ќе се случи во Саудиска Арабија.
Иако не е објавен датум за евентуална средба, прашан дали ќе се сретне со Путин пред крајот на овој месец, Трамп одговори – „веројатно“.
Во меѓувреме, европските претставници ги повикаа САД да не паѓаат во стапиците на Москва.
„Заедно со европските министри за надворешни работи разговарав со државниот секретар на САД, Марко Рубио, по неговите разговори во Ријад. Русија ќе се обиде да не подели. Да не одиме во нивните стапици. Работејќи заедно со САД, можеме да постигнеме праведен и траен мир, според условите на Украина“,
напиша високата претставничка на Европската Унија за надворешни работи и безбедносна политика Каја Калас на платформата Икс.