Според неа, директните ефекти од воведувањето на американските царини не се големи кога станува збор и за извозот и за увозот, како и дека трговската размена со САД е под еден отсто
Работиме на тоа да издејствуваме да потпишеме договор за слободна трговија со Соединетите Американски Држави (САД). Верувам дека на крајот Министерството за надворешни работи и надворешна трговија ќе успее да потпише таков договор, со што ќе имаме и промени на царинските тарифи. Ова денеска на прес-конференција го рече министерката за финасии Гордана Димитриеска-Кочоска, одговарајќи на новинарско прашање што ќе ѝ понуди Владата на американската администрација за царините од 33 отсто што ги воведоа САД за увоз на стоки од земјава.
Министерката посочи и дека она што може македонската влада да ѝ го понуди на американската администрација е и да се спуштат царинските стапки и до нула.
„Доколку не успееме да потпишеме таков договор, ќе видиме што ќе правиме понатаму. Од наша страна првично ќе понудиме намалување на царинските тарифи“,
рече таа.
Посочи дека министерот за надворешни работи и надворешна трговија Тимчо Муцунски е во постојана комуникација со САД за проблемот со царините и очекува во најскоро време да има разрешница.
Министерката додаде и дека директните ефекти од воведувањето на американските царини не се големи кога станува збор и за извозот и за увозот, како и дека трговската размена со САД е под еден отсто.
„Подготвуваме измени во Законот за царинските стапки, со кои можеме да одиме на нивно намалување дури и до нула, зашто ефектот нема воопшто да биде голем, бидејќи целиот извоз лани бил нешто над 100 милиони евра, што е многу малку во споредба со размената со останатиот дел од светот“,
кажа министерката.
Според неа, каква било промена на царинските стапки нема да има никакво влијание на буџетот.
„Во државата не постои царинска тарифа од 65 отсто. Немаме толку високи царински стапки. Затоа сметаме дека станува збор за грешка“,
додаде Димитриеска-Кочоска.
Се согласи со новинарската констатација дека во пресметката на САД за висината на нашите царини од 65 отсто има и одредени додатоци, и тоа го оцени како нормално, оти секоја држава настојува да си го заштити домашното производство.
„Тоа е пред сѐ во делот на земјоделските производи. Во делот на другите царински стапки немаме толку високи тарифи“,
рече таа.
На новинарското прашање дали ќе имаме индиректни ефекти, со оглед дека 70 отсто од извозот завршува на пазарите на Европската Унија, одговори дека нема да имаме директни негативни ефекти за краток рок.
„Иако ги зголемија царините и за европските држави, не постои супститут во САД кој преку ноќ ќе го зголеми производството за да може да каже, добро, ќе купуваме од домашните производители. Да оставиме времето да покаже какви ќе бидат случувањата, но да не заборавиме дека и приватниот сектор во Европа, а и европските држави ќе имаат билатерални разговори со САД. Во делот на преселба на капиталот, многу е тешко да се преселуваат капацитети. Тоа е невозможно“,
вели министерката.
Побара да не се крева паника пред време, но и дека очекува европските држави да се договорат со САД.
„Во државата имаме проблем само во една ситуација со една компанија, која директно зависи од извозот во САД, и сега тој проблем го решаваме. Дури ниту тие нема да ги отпуштат работниците преку ноќ“,
посочи Димитриеска-Кочоска.
Како земја која има недостиг на работна сила, смета дека во овој момент не постои поголем ризик дека ќе има отпуштање на работници и дека тие нема да најдат работа на друго место.
Премиерот Христијан Мицкоски вчера, говорејќи за царините од 33 отсто што ги воведоа САД за увоз на стоки од земјава, рече дека многу скоро очекува да се коригираат царинските тарифи, за кои смета дека се резултат на некаква грешка или погрешна информација.