Вашингтон изврши притисок врз канадската влада барајќи од неа да ги искористи „федералните овластувања“ за да ја прекине блокадата, што има сериозни последици за американската економија
Мостот „Амбасадор“, клучна гранична точка меѓу Канада и САД, кој седум дена беше блокиран од демонстрантите против мерките воведени против коронавирусот, повторно е отворен за сообраќај од вчеравечер.
„Мостот ‘Амбасадор’ е целосно отворен и повторно е овозможен слободниот проток на трговија меѓу канадската и американската економија“,
соопштија канадските власти.
Граничната служба на оваа земја изјави и дека на мостот сега се нормализирани граничните операции и додаваат дека не се препорачуваат патувања кои не се неопходни. На канадската полиција ѝ беа потребни два дена да го евакуира мостот што беше блокиран од демонстрантите од минатиот понеделник.
Повеќето камиони беа отстранети од мостот во саботата, но неколку стотици демонстранти одбија да го напуштат. Полицијата со опрема упадна на собирот во петокот, при што беа отстранети околу 25 демонстранти со камиони.
Вашингтон изврши притисок врз канадската влада, барајќи од неа да ги искористи „федералните овластувања“ за да ја прекине блокадата, што има сериозни последици за американската економија.
Протестите против епидемиолошките мерки ја тресат Канада веќе две недели. Демонстрантите од 29 јануари ги блокираа улиците на Отава и неколку гранични премини.