Корисниците на мобилна телефонија што евентуално „наседнале“ на последните измами со пропуштени повици и ќе добијат повисоки сметки треба да се обратат до операторите и да поднесат приговор за евентуална корекција, како што било тоа и досега велат од Агенцијата за електронски комуникации за МИА.
Се работи за неодамнешниот случај кога илјадници домашни претплатници на двата мобилни оператори беа вознемирени со кратки повици од непознати броеви од странство. Повиците потекнуваа најчесто од Литванија, Естонија и сателитскиот оператор Глобал стар.
Неколку часа по повиците беа блокирани најголем дел од броевите преку кои се остваруваше ваквата измама, но, како што предупреди АЕК, тоа не значи дека ваква измама нема да се повтори од други броеви во иднина.
Измама со јапонско потекло
Измамата со пропуштен повик се нарекува вангири (Wangiri Scam), потекнува од Јапонија и значи „еден повик и исклучи”. Претплатникот добива краток повик, најчесто едно звонење од број од странска држава што има висока цена на меѓународни повици.
Ваквиот повик не му се наплаќа на крајниот корисник, иако имаше разни шпекулации што циркулираа по медиумите дека имало случаи кога и вакви кратки пропуштени повици им се наплаќале на корисниците.
Штетата за крајниот корисник настанува тогаш кога корисникот поради незнаење дека има пропуштен повик ќе го повика пропуштениот повик и ќе му биде наплатена висока цена на меѓународен разговор. Штетата ќе биде поголема доколку корисникот остане подолго во разговор со повиканиот број. Најчесто од другата страна повикот е одговорен од автоматска порака што го наведува корисникот да остане на линија колку што е можно подолго.
На вангири-напади не се изложени само претплатниците на комуникациски услуги во државава, односно такво искуство имаа и многу други земји, како Америка, Австралија, Велика Британија…
Од АЕК укажуваат дека единствена мерка за заштита за крајните корисници се едукација и подигање на свеста за можните измами, бидејќи не постои софистицирано техничко решение што операторите би можеле да го имплементираат за да може автоматски да ги спречат ваквите појави.
На 19 овој месец илјадници граѓани пријавија дека рано наутродобиле телефонски повици од непознати странски броеви, најчесто со префикс +881 кој не е евидентиран како повикувачки број од ниту една држава. Од Макеоднски Телеком соопштија дека најверојатно се работи за хакерски напад и препорачаа во никој случај корисниците на нивните услуги да не се јавуваат доколку добијат повик од броеви кои им се сомнителни и веднаш да ги пријават, за ваквите броеви да бидат блокирани.