Министерството за надворешни работи демантираше дека не е прифатен предлогот на Владата за амбасадор во Брисел да биде испратена Теута Арифи, бидејќи како што велат оттаму, досега воопшто не ни бил испратен таков предлог за наш амбасадор до ЕУ.
Претходно МКД.мк ја објави информацијата дека поранешната градоначалничка на Тетово и членка на ДУИ, „не го поминала филтерот на ЕУ“, откако претходно Владата ја предложила Теута за амбасадор, повикувајќи се на „доверливи дипломатски извори“.
Сепак, набргу по оваа вест која се рашири и во другите медиуми, МНР излезе со демант.
„Министерството за надворешни работи ги демантира шпекулациите кои се појавија во одредени медиуми дека не е прифатено барање за агреман за амбасадор на Република Северна Македонија во Брисел од причини што досега воопшто не е пратен предлог за добивање на агреман до Европската Унија, затоа што се уште нема усогласен предлог на државата за амбасадор“,
се вели во демантот на МНР.