Укажуваме дека во согласност со Уставот на РС Македонија и законите, како и на меѓународното право, надлежните институции на Северна Македонија се должни и ги презедоа сите неопходни мерки да се спречат провокации, тензии и инциденти кои можат да ги загрозат националната безбедност, јавниот ред, здравјето на луѓето и меѓународните односи на државата, велат од МНР
МНР дополнително информира дека ќе упати писмо до Европскиот парламент за навредите кон Македонците на бугарскиот европратеник Александар Јорданов, упатени преку Фејсбук
И покрај искажаната волја, Република Бугарија не направи доволно напори да спречи пристапување на радикални поединци на граничниот премин „Деве Баир“, овозможувајќи на тој начин дел од нив да се однесуваат агресивно, да ги навредуваат и да применат насилство кон претставниците на граничната полиција на Северна Македонија, реагира преку соопштение Министерството за надворешни работи (МНР).
Оттаму нагласуваат дека чествувањето на 151-годишнината од раѓањето на Гоце Делчев поминало во најдобар ред и без нарушување на јавниот ред и мир, со овозможен пристап на многубројни официјални и граѓански делегации од Република Северна Македонија, вклучително и на официјалната делегација на Република Бугарија и на бугарски граѓани, да му оддадат почит на великанот.
„Сепак, со жалење констатираме дека во пресрет и по одбележувањето на 151 година од раѓањето на Гоце Делчев во Северна Македонија, радикални поединци, претставници на организации и политички партии во Бугарија продолжуваат да изразуваат територијални претензии кон Република Северна Македонија и континуирано го нарушуваат достоинството на македонските граѓани, македонскиот народ и нашата држава. Укажуваме дека во согласност со Уставот на Република Северна Македонија и законите, како и на меѓународното право, надлежните институции на Северна Македонија се должни и ги презедоа сите неопходни мерки да се спречат провокации, тензии и инциденти кои можат да ги загрозат националната безбедност, јавниот ред, здравјето на луѓето и меѓународните односи на државата. И покрај искажаната волја, Република Бугарија не направи доволно напори да спречи пристапување на радикални поединци на граничниот премин ‘Деве Баир’, овозможувајќи на тој начин, дел нив да се однесуваат агресивно, да ги навредуваат и да применат насилство кон претставниците на граничната полиција на Северна Македонија“,
се наведува во соопштението на МНР.
Оттаму нагласуваат дека приведувањето и изведувањето пред суд на тројцата бугарски државјани кои се обидоа физички да ги нападнат македонските полицајци, било спроведено согласно утврдените протоколи за работа и стандардите на ЕУ за безбедно управување со границите.
Истовремено, Министерството за надворешни работи информира дека ќе упати писмо до Европскиот парламент во кое ќе информира за недоличното и навредливо однесување на бугарскиот европратеник Александар Јорданов на социјалните мрежи.
„Министерството за надворешни работи на Република Северна Македонија ги демантира наводите дека со Република Бугарија било договорено заедничко чествување на Гоце Делчев. Потсетуваме дека една од задачите на Заедничката експертска комисија за историско-образовни прашања, формирана согласно Договорот за пријателство, добрососедство и соработка со Бугарија, е да изготви препораки за заедничко чествување на историски личности. До овој момент, Заедничката комисија нема изготвено препорака за заедничко чествување на Гоце Делчев. Истовремено, на официјалната бугарска делегација предводена од вицепремиерот и министер за внатрешни работи Иван Демерџиев, како искрен и последователен гест ѝ беше овозможено непречено да положи цвеќе пред гробот на Гоце Делчев во црквата ‘Свети Спас’ во Скопје“,
се додава во соопштението на МНР.
Република Северна Македонија во континуитет негува добрососедски односи и се залага за воспоставување одржливи пријателски односи и продуктивна соработка со сите соседни држави, вклучувајќи ја и Република Бугарија, потенцираат од МНР.
„Во склад со овие определби, очекуваме од властите во Република Бугарија, во духот на пријателството и добрососедството, принципиелно да се заложат и да ги преземат сите неопходни дејствија за деескалација на тензиите преку јавна осуда и преземање меки против сите дејствија кои не придонесуваат за водење на конструктивен и добронамерен дијалог базиран на меѓусебно уважување и почитување“,
децидни се од македонското Министерство за надворешни работи.