Во ваквиот евентуален потег, Мицкоски гледа обид на власта да се заузда притисокот кој доаѓа од опозицијата, со што барањето за предвремени избори би станало беспредменто, бидејќи за неколку месеци, односно следната година треба да се случат редовните претседателски и парламентарни избори
За потсетување, претседателот на Собранието, Талат Џафери, во изјава по денешниот брифинг со новинарите навести дека по исцрпување на дебатата, можно е гласањето за уставните измени да биде одложено до моментот кога ќе биде обезбедено потребното двотретинско мнозинство. Собранискиот спикер рече дека станува збор за непредвидлива ситуација, но Деловникот го дозволува тоа, независно што расправата е закажана за 18 август, која, како што потсети Џафери, трае најмногу десет дена
Можноста за одложено гласање на уставните измени додека не се обезбеди двотретинско мнозинство, што денеска ја навести собранискиот спикер Талат Џафери, лидерот на опозициската ВМРО-ДПМНЕ, Христијан Мицкоски, ја оценува како обид за „купување време за спас на политичките кариери на неколкумина во Владата“.
Според Мицкоски, јасно е дека власта кубури со двотретинско мнозинство за да бидат изгласани уставните измени, кои веќе се влезени во собраниска процедура и го поминаа првиот филтер пред Комисијата за уставни прашања и оти сега борбата, како што вели, е како да го поминат месец август бидејќи власта е под притисок од предвремени избори.
„Ако имаа двотретинско мнозинство досега, во овие изминати повеќе од година дена, овие уставни измени ќе беа веќе на маса, односно потребата за отворање на Уставот ќе беше на маса и тогаш ќе знаевме што сме и како сме. Јасно е дека тие немаат две третини. Сега веќе борбата кај поединци во Владата не е за уставните измени, борбата е како да го поминат месец август и дополнително да манипулираат со граѓаните и со јавноста бидејќи се под притисок за избори наесен. А избори наесен за дел од владините министри кои се дел од помалиот коалиционен партнер СДСМ ќе значат крај на нивната политичка кариера, но исто така и за дел од министрите кои се дел од Демократската унија за интеграција (ДУИ) ќе значи, исто така, крај на нивната политичка кариера бидејќи силно верувам дека ќе бидат непријатно изненадени од резултатот којшто ќе се случи доколку тие избори бидат наесен, односно предвремени“,
изјави лидерот на ВМРО-ДПМНЕ за време на денешната посета на општина Петровец, каде што беше прашан од новинарите за коментар на денешната изјава на Џафери.
Власта сака да го направи беспредметно барањето на опозицијата за избори наесен
Во ваквиот, евентуален потег за купување време, Мицкоски гледа обид на власта да го заузда притисокот кој доаѓа од опозицијата, со што барањето за предвремени избори би станало беспредменто, бидејќи за неколку месеци, односно следната година треба да се случат редовните претседателски и парламентарни избори.
„Така што сега ова веќе е борба како да се премости авгусат за да дојдеме до септември и да биде беспредметно практично повеќе барањето за предвремени парламентарни избори бидејќи секако во март, април имаме редовни претседателски избори итн. Така што овде сега не барајте политика, барајте лично, ситно политиканство – како уште месец, два повеќе да бидат повеќе на функција таму каде што се“,
рече Мицкоски.
Тој го повтори ставот на ВМРО-ДПМНЕ, и дека тоа треба да ѝ биде јасно на македонската јавност, дека уставни измени под бугарски диктат и под овие околности нема да има. А тоа, како што додаде, се видело и на Комисијата за уставни прашања.
„Немаат две третини од пратениците, од 17 (члена на Комисијата за уставни прашања) требаше да имаат 12, тие имаа 10. Јасен беше ставот на седумтемина пратеници на коалицијата предводена од ВМРО-ДПМНЕ дека се против, така ќе биде и на пленарната седница, кога и да се случи тоа. Но ова веќе не е процес за уставни измени, туку купување време за личните политички кариери на неколкумина во Владата“, изјави денеска лидерот на ВМРО-ДПМНЕ.
Прашан дали пратениците на ВМРО-ДПМНЕ ќе учествуваат на расправата во Собранието на 18 август, Мицкоски одговори:
„Дополнително ќе ја утврдиме стратегијата, но, да, ќе бидеме присутни на самата седница и она што знам сигурно е дека ќе гласаме против тој дневен ред којшто ќе ја вклучува точката за отпочнување на потребата за отворање на Уставот. За тоа ќе гласаме против, но за натамошниот тек на седницата дополнително ќе се координираме со пратениците“
Не сум разговарал со Меџити, Касами и Гаши за уставните измени, вели Мицкоски
На прашањето дали е во комуникација со предводниците на инцијативата за формирање опозициски блок во албанскиот политички кампус и дали го проверил пулсот кај нив во врска со уставните измени, Мицкоски првин рече: „Не знам за кој блок зборувате“.
Откако од новинарот му беше појаснето дека мисли на поранешниот функциор на ДУИ кој иницираше формирање на ново движење, Изет Меџити, на лидерот на Беса, Билал Касами, и првиот човек на Алтернатива, Африм Гаши, лидерот на ВМРО-ДПМНЕ одговори одречно.
„Не, не сум разговарал со господата Меџити, Гаши и Касами околу уставните измени. Она што за мене е важно се 44 пратеника на ВМРО-ДПМНЕ и коалицијата и тие се столбот на одбрана на Македонија и на македонските национални интереси и јас се потпирам на тој столб и мислам дека граѓаните на Македонија треба да се потпрат на тој столб“,
рече Мицкоски.
За потсетување, претседателот на Собранието, Талат Џафери, во изјава по денешниот брифинг со новинарите навести дека по исцрпување на дебатата, можно е гласањето за уставните измени да биде одложено до моментот кога ќе биде обезбедено потребното двотретинско мнозинство. Собранискиот спикер рече дека станува збор за непредвидлива ситуација, но Деловникот го дозволува тоа, независно што расправата е закажана за 18 август, која, како што потсети Џафери, трае најмногу десет дена.
„Чинот на гласање не е врзан за последниот ден, тоа да биде јасно во поглед на постапките. Тоа го предвидува Деловникот, а го покажува и праксата претходно од слични иницијативи за уставни измени, затоа што Собранието одлучува доколку го има потребно мнозинство за одлучување. Во тие рамки, не можам да претпоставам што и како ќе се случува, но формално Собранието ќе почне со расправа на 18 август, а чинот на гласање дали ќе биде по завршување на расправата или ќе биде одложено, зависи од конкретната состојба на деновите во кои тече расправата“,
рече Џафери.
Процедурата за уставни измени почна изминатите денови, откако собраниската Комисија за уставни прашања со 10 гласа „за“ и седум „против“ го поддржа предлогот на Владата за пристапување кон измена на Уставот.
Иако дебатата пред собраниската Комисија можеше да трае 10 дена, таа заврши за околу два часа, откако од името на пратениците на опозициската ВМРО-ДПМНЕ, координаторот Никола Мицевски го повтори ставот дека нема да поддржат уставни измени. Ниеден друг пратеник од ВМРО-ДПМНЕ не се вклучи во расправата на комисиската седница.
За комплетирање на првата од вкупно три фази на процедурата за уставни измени, за предлогот за пристапување кон измена на Уставот да помине на пленарната седница која ќе почне на 18 август, потребна е двотретинска поддршка (најмалку 80 гласа). Ако се случи тоа, процедурата ќе продолжи со следната фаза – подготовка и усвојување на нацрт-амандмани. Тогаш се доволни и 61 глас. Двотретинска поддршка повторно е потребна при третото гласање (фаза) – за предлог-амандманите.