„Едниот е директен, во смисла ќе ви се случи лошо вам и на вашите блиски ако поддржите избори, а вториот тип на закани е преку посредници на луѓе блиски до тие пратеници, нивни роднини и пријатели“, вели лидерот на ВМРО-ДПМНЕ во интервју за Дојче веле
Има два типа закани за кои сум информиран дека ги добиваат пратениците од владејачката коалиција кои би поддржале распуштање на Собранието и распишување предвремени парламентарни избори, вели лидерот на опозициската ВМРО-ДПМНЕ, Христијан Мицкоски во интервју за Дојче веле, откако вчера обвини дека полукриминални групи на СДСМ и ДУИ вршат притисоци врз овие пратеници од власта.
„Има два типа на закани за кои сум информиран – едниот е директен, во смисла ќе ви се случи лошо вам и на вашите блиски ако поддржите избори, а вториот тип на закани е преку посредници на луѓе блиски до тие пратеници, нивни роднини и пријатели. Добро е што поголемиот дел се охрабрени и директно сведочат за таквиот однос. Јас сум убеден дека тие ќе останат доследни, бидејќи борбата за Македонија нема цена, а криминалците еден ден ќе зажалат за ова што го прават“,
вели Христијан Мицкоски во интервју за Дојче веле.
Пратениците кои се предмет на обработка, вели тој, се во грч, но и разочарувања од таквиот приод.
Според лидерот на опозициската партија, сѐ повеќе пратеници ја воочуваат комплицираноста на состојбите и фактот дека изборите се единственото можно решение за излез од истите тие состојби.
Мицкоски додава дека со порастот на бројот на пратеници кои се охрабруваат да говорат за потребата од избори, пропорционално се зголемуваат и притисоците кои, како што вели, овие пратеници ги добиваат во форма на заплашувања од криминални и неформални групи под раководство на СДСМ и ДУИ.
„Тоа се припадници на истите оние групи, кои непречено во овие шест години градат бизнис империја и се заштитени од прогон и допир на правдата. Тоа се истите оние луѓе кои полутајно се поздравуваат, а дел и јавно се фотографираат со истите водства од власта на партиски и други политички настани, имаат дебели полоциски досиеја и сѐ уште се на слобода и покрај десетици случаи за работа со недозволени материи, рекети и изнуди”,
вели лидерот на ВМРО-ДПМНЕ.
Лидерот на најголемата опозициска партија во земјава вчера од Охрид обвини дека полукриминални групи контролирани од СДСМ и ДУИ вршат притисок врз пратениците од власта кои сакаат да поддржат распуштање на Собранието и распишување на предвремени избори.
Изјавата на Мицкоски, пак, од СДСМ ја оценија како лага.
„Не доликува на било кого, најмалку на политичар, верските празници да ги користи за лажење на народот. Ниту има, ниту ќе има распуштање на Собранието, ниту пак има притисоци врз пратеници“,
порачаа од СДСМ.
Дека има пратеници од власта кои сигнализираат дека се подготвени да поддржат предвремени избори, Мицкоски соопшти неколку дена пред Нова година, но не сакаше да каже повеќе детали за да ги заштити, како што рече, од притисоци.