На новинарско прашање дали ставот што го има, во врска со уставните измени со одложено дејство, може да биде дел и од разговорите во Брисел, Мицкоски одговори дека не би сакал да коментира, но оти се јасни позициите на Владата по ова прашање
Во Брисел ќе патувам не за да го презентирам Планот за раст, туку за да ја претставиме фрустрацијата што ја чувствуваат македонските граѓани, вели премиерот Христијан Мицкоски пред неговото заминување во Брисел.
„Доколку стане збор за евроинтегративниот процес, јас сум тој што треба да ги брани и да ги одбрани нашите национални интереси. Како што беше во минатото, кога бевме опозиција, така и сега како влада, сакаме да ги претставиме аргументите, сакаме фрустрацијата што ја чувствуваат македонските граѓани да ја пренесеме таму бидејќи таа е огромна. Повеќе од две децении откако го почнавме овој наш пат кон ЕУ, повеќе од деценија и пол откако официјално го добивме првиот позитивен извештај од страна на ЕК за почнување на овие преговори ние не сме во можност да почнеме“,
рече Мицкоски денеска одговарајќи на новинарски прашања додека присуствуваше на означување почеток на доградба на ОУ „Блаже Конески“ во Општина Аеродром.
Мицкоски рече дека Планот за раст е доставен до Европската комисија и во Скопје и во Брисел од страна на македонската Влада која, како што рече, подготвила фантастичен документ.
„Прв и најквалитетен документ, којшто долги месеци беше во застој. Со формирањето на Владата тоа го поднесовме во канцеларијата на Европската комисија тука во Скопје, а потоа да тоа пристигне во Брисел. Тоа е целта на мојата посета и работен ручек со старо-новата претседателка на Европската комисија, Урсула фон дер Лајен“,
рече Мицкоски.
Ако се разговара за евроинтеграцискиот процес, Мицкоски вели дека ќе ги брани и одбрани македонските национални интереси.
На новинарско прашање дали ставот што го има, околу уставните измени со одложено дејство може да биде дел и од разговорите во Брисел, Мицкоски одговори дека не би сакал да коментира, но оти се јасни позициите на Владата по ова прашање.
„Не би сакал да коментирам, позицијата на ВМРО-ДПМНЕ, позицијата на Владата е јасна. Мојата позиција е јасна. Доста беа порази, доста беа политики и дипломатија на свиткана кичма и на бакнување на чевли. Сега имаме политика и дипломатија, која што се темели на двонасочна улица. Сакам да зборуваме за вредности, за почитување на човекови права и да знаеме ако го отпочнеме, како што ни беше ветувано во таа 2018 година за три, четири, пет години максимум, ќе го завршиме тој пат и ќе бидеме членка на Европската унија“,
рече Мицкоски.
Се останато, додаде тој, се приказни и замки на коишто како Влада, а ниту, пак, јас како човек имам намера да наседнувам.
Со премиерот Мицкоски во Брисел ќе патува и министерот за надворешни работи и надворешна трговија Тимчо Муцунски. Од министерството најавија дека Муцунски ќе оствари средба со генералниот секретар на НАТО, Јенс Столтенберг, во пресрет на неговото заминување од функцијата.
Во рамки на работната посета, заедно со премиерот Мицкоски, министерот Муцунски ќе оствари работни средби со високи претставници на институциите на Европската Унија.
За посетата на Брисел и по изјавите на премиерот Христијан Мицкоски за „француски предлог плус“, а и по најавите дека во Брисел неделава тој ќе презентира план за деблокирање на евроинтеграциите, шефот на македонската дипломатија Тимчо Муцунски, во интервју за „360 степени“ на МРТ 1, рече дека тоа пред сè се однесува на стопирање на билатерализацијата.