Лидерот на ВМРО-ДПМНЕ го отвори и прашањето за преиспитување на регистрацијата за гласање во дијаспората, рече дека за спроведување на изборите на ДИК ѝ се потребни од 35 до 50 дена и тврди дека Заев поставувал ултиматуми на лидерската средба
Три можни термини за одржување избори, сите на крајот на летото, предложил лидерот на ВМРО-ДПМНЕ Христијан Мицкоски, како што соопшти по денешната лидерска средба.
Мицкоски кажа дека предлага датуми што не мора да бидат фиксни, туку треба да се одредат во зависност од тоа како ќе се развива ситуацијата со коронавирусот. Тој ги предлага како можни датуми 23, 30 август или 13 септември.
„Се согласувам дека ние ќе мора да научиме да живееме со овој вирус. Меѓутоа, на крајот на летото очекуваме неговиот интензитет да биде послаб“,
вели Мицкоски.
Мицкоски ги спори документите што стигнале од Комисијата за заразни болести, од ДИК и од ОБСЕ. Односно, тој посочи дека одговорот од ОБСЕ/ОДИХР е дека не можат да преземат ништо додека не се утврди изборен датум. За документот од ДИК, пак, посочи дека укажува дека за спроведување на изборните дејствија се потребни од 35 до 50 дена. Исто така, посочи дека треба да се преиспита регистрацијата на гласачите од дијаспората, за да не им се ускрати правото на глас.
Тој, посебно ја критикуваше Комисијата за заразни болести, затоа што, како што рече, излегла со предлози како да се оди на гласање, наместо со проценка дали има услови за спроведување избори.
„Јас од лична култура знам дека треба да мијам раце и дека треба да носам маска во време на епидемија. Не е неопходен посебен протокол за нешто што веќе на сите им е познато. Но што да очекуваме од комисија во која има и член што е кандидат на СДСМ за пратеник“,
рече Мицкоски.
Тој рече дека лидерот на СДСМ, Зоран Заев, на средбата настапил со ултиматум што не сака да го коментира.
Мицкоски не даде конкретен одговор дали ако има избори во јуни би бил подготвен да ги бојкотира, иако кандидатските листи се утврдени, а утврден е и редоследот на кандидатите на гласачкото ливче.
„Не би сакал да разговарам за нешто што не сакам да се случи“,
рече Мицкоски.