„Тоа што досега е работено на диво и незаконски, тоа нема да биде пракса во работењето на оваа влада“, рече премиерот
Изет Меџити ќе биде прв вицепремиер во Владата, потврди денеска премиерот Христијан Мицкоски. Но тоа, како што вели премиерот, ќе биде во рамките на џентлменскиот договор што го имаат во коалицијата.
„Според законот што е важечки, Владата односно премиерот има заменици, а договорот којшто го имаме во рамките на коалицијата е џентлменски. Да, да има прв вицепремиер и тоа ќе биде господинот Изет Меџити. Но, тоа е надвор од законот. Законот вели односно подразбира само заменици на претседателот на Владата“,
рече Мицкоски денеска одговарајќи на новинарско прашање.
Според него, досега тоа што имало прв вицепремиер е работено на диво и незаконски.
„Тоа нема да биде пракса во работењето на оваа Влада. Но, да џентлменскиот договор во рамките на нашата коалиција и во рамките на нашето функционирање е таква“,
рече Мицкоски.
Новата влада, која беше изгласана во неделата, има вкупно 20 министерства, додека владиниот кабинет брои 24 члена. Покрај премиерот, има уште 23 вицепремиери и министри, од кои 20 со ресор.
Мицкоски ќе има пет заменици односно вицепремиери. Во владиниот кабинет, 15 членови се од коалицијата предводена од ВМРО-ДПМНЕ, шест од коалицијата Вреди и двајца од ЗНАМ.