Посочи дека инвестицијата ќе се реализира во две фази. Во првата фаза е предвидена изградба на Клиничката болница во Штип, Факултетот за медицински науки и студентски дом, Здравствен дом со проширена дејност во Кичево, како и реконструкција на Клиничката болница во Тетово. Во втората фаза е предвидена изградба на нов клинички центар во Скопје
Премиерот Христијан Мицкоски денеска од Кичево соопшти дека е завршен повикот за избор на компанија што ќе ги финансира капиталните проекти во сферата на здравството во Штип, Кичево и Тетово. Најави дека Владата веќе следната недела ќе ги разгледува пристигнатите понуди.
Според него, проектите поврзани со здравството се дел од стратегиското партнерство со Обединетото Кралство, а гаранцијата за нивното финансирање ќе ја издаде британската Ексим банка.
„Министерството за финансии веќе имаше меѓународен повик, на кој бараме компанија што ќе ги финансира тие проекти, а практично гаранција ќе издаде Ексим банката на Обединетото Кралство. Повикот е завршен, ги имаме понудите и веќе во следната недела ќе ги анализираме“,
рече тој одговарајќи на новинарски прашања при неговата посета на Кичево.
Посочи дека инвестицијата ќе се реализира во две фази. Во првата фаза е предвидена изградба на Клиничката болница во Штип, Факултетот за медицински науки и студентски дом, Здравствен дом со проширена дејност во Кичево, како и реконструкција на Клиничката болница во Тетово. Во втората фаза е предвидена изградба на нов клинички центар во Скопје.
„По завршувањето на евалуацијата и изборот на финансиска институција, продолжуваме со реализација на проектите“,
кажа премиерот.
Осврнувајќи се на изградбата на затворениот базен во Кичево, премиерот изјави дека тој е еден од проектите што ги наследиле во „фаза до никаде“ од претходната влада на СДСМ и ДУИ, но дека сега се отстранети сите пречки за продолжување на активностите.
Очекува дека базенот наскоро ќе биде целосно завршен и додаде дека паралелно се финализираат и други проекти од сличен карактер.
Според градоначалникот на Кичево, Александар Јовановски, базенот го затекнале без приклучок за струја и без доведен електричен кабел до самиот базен. Додаде дека во меѓувреме тие проблеми се надминати.
Според него, веќе е извршено и пробно полнење на базенот, а преостануваат уште асфалтирање на пристапот, изградба на паркинг и хортикултурно уредување на просторот околу објектот.