Ќе има и други чекори, нема да биде само блокадите, ќе треба органите на партијата да се произнесат за тие други чекори, изјави лидерот на ВМРО-ДПМНЕ, Христијан Мицкоски, во вечерашното гостување во емисијата „Топ тема на Ваша страна“ на ТВ Телма, зборувајќи за активната блокада во Собранието од страна на опозицијата.
Мицкоски истакна и дека Владата на СДСМ немала капацитет да ги реши проблемите на граѓаните и додаде дека поради тоа „легитимно е тие како опозиција да бараат предвремени парламентарни избори“.
„Јас кажав дека ова ќе потрае заради тоа што цениме дека во овој момент ситуацијата во државата не оди во вистинска насока и дека имаме многу проблеми, а оваа влада очигледно е дека нема капацитет да ги решава тие проблеми, затоа нормално и легитимно е како опозиција која што победила убедливо на локални избори да бара предвремени парламентарни избори“,
нагласи Мицкоски.
Инаку, ВМРО-ДПМНЕ од вчера го блокира Собранието, откако претходно премиерот Димитар Ковачевски одби лидерска средба со Мицкоски, на која како што потенцираше лидерот ВМРО-ДПМНЕ во поканата, требало да се договори датум за одржување на предвремени парламентарни избори.