Тој вели дека ќе работи за да ја смени реалноста кога еден ден ќе седи на иста маса со партнерите, но во меѓувреме ќе работи за подобар стандард, правда…
На прашањето што доколку се состави нова влада предводена од ВМРО-ДПМНЕ, тој рече дека би бил премиер само ако таа има политички легитимитет до крајот на мандатот, а не ако е со ограничен рок на траење
Лидерот на ВМРО-ДПМНЕ, Христијан Мицкоски, во вечерашното гостување на ТВ Сител, зборувајќи за политичките случувања во земјата, рече дека нему никој не може да му забрани да биде несреќен и да сонува дека ќе ја исправи неправдата од Преспанскиот договор, но и дека СДСМ шири хистерија околу ставовите на ВМРО-ДПМНЕ за него.
Тој вели дека нема да ја повторува придавката во уставното име како што тоа го прави Зоран Заев, но оти таа е реалност која не може да се игнорира.
„Не можеме оваа хистерија која ја шири СДСМ по нивниот дебакл на изборите да ја претвориме во нивна предност и да дозволиме во Македонија да продолжи криминалот, корупцијата и да умираат луѓе поради неспособноста, за да им оставиме и понатаму да имаат само еден аргумент да седат во Владата, а тоа е придавката – да ја повторуваат дури и кога се будат на сабајле и да заспиваат со неа. Не можете од мене да очекувате дека јас ќе ја повторувам како Зоран Заев придавката, тоа нема никогаш да го направам. Но, Преспанскиот договор, кој носи со себе определена реалност во Македонија – ние сме дел од тоа Собрание, учествуваме на избори, не можеме ние да игнорираме и да бидеме лицемерни и да велиме не е тоа реалност. И тие што учествуваа еве на овие избори потпишаа изјави со таа реалност“,
рече Мицкоски.
Тој вели дека ќе работи за да ја смени реалноста кога еден ден ќе седи на иста маса со партнерите, но во меѓувреме ќе работи за подобар стандард, правда.
„Што сега, ние ќе викаме не е тоа реалност? Ќе се правиме слепи и ќе му даваме аргумент на СДСМ и Зоран Заев да продолжат да ја пустошат Македонија? Не, ама ќе продолжиме да работиме еден ден кога ќе имаме можност, кога ќе седнеме заедно со нашите партнери на истата маса да ја исправиме и сите тие грешки кои се резултат на таа реалност да ги исправиме. Во меѓувреме ќе работиме за повеќе пари, подобар стандард, поквалитетно образование, реформирано здравство, судии и обвинители кои навистина ќе судат според закон.“,
рече Мицкоски.
Мицкоски во гостувањето ги повтори ставовите кои ги изнесе и на денешната прес-конференција, односно дека треба да се оди чекор по чекор, за да види што понатаму, а прво рече дека треба да се изгласа недоверба на актуелната влада. На прашањето што доколку се состави нова влада предводена од ВМРО-ДПМНЕ, тој рече дека би бил премиер само ако таа има политички легитимитет до крајот на мандатот, а не ако е со ограничен рок на траење.
„Доколку таа влада има ограничен рок на траење секако дека не. Но ако има политички легитимитет до крајот на мандатот, па потоа да бараме повторно на редовни парламентарни избори, тогаш треба да разговараме внатре во партијата и да видиме што ќе одлучат органите на партијата. Се надевам дека ќе ја добијам довербата и ќе се обидам јас да составам една таква влада. Но, доколку со партнерите разговараме за влада која треба да обезбеди фер предвремени парламентарни избори тогаш јас ќе бидам човек кој ќе биде само претседател на ВМРО-ДПМНЕ“,
рече Мицкоски.