Многумина очекуваат по ваква мафијашка акција од власта да следува и слична реакција. Но, ние тоа нема да го направиме. Нема да се спуштиме на тоа ниво со кое, за жал, тие ја деградираа позицијата пратеник и го нарушија угледот на институцијата Собрание, порача Мицкоски
По неуспешниот обид да и се изгласа недоверба на Владата, лидерот на ВМРО-ДПМНЕ, Христијан Мицкоски, денеска уште еднаш порача дека се неопходни предвремени парламентарни избори.
На новинарски прашања за најавите за зголемување на владејачкото мнозинство и за тоа дали има опција опозициски пратеници да преминат во власта, Мицкоски вели дека за тоа ќе одлучи народот.
„Јас не сум секундант за да можам да кажам кога ќе замине владата дали утре, дали за една недела или месец, но знам сигурно дека ќе замине, а кога ќе биде, ќе одлучи народот на предвремени парламентарни избори кои треба да се случат час поскоро. Ако нема избори, дополнително ќе мора да го цениме оценувањето на Владата како неодговорно кон граѓаните. Апелирам да разберат дека се поразени и заедно да организираме брзи парламентарни избори и да дојде нова Владата која ќе работи во интерес на народот“,
вели Мицкоски.
Тој рече дека во моментов има 59 пратеници од власта, 60 од опозицијата и еден пратеник, кој, како што рече, не знае каде е. Во таа насока, Мицкоски упати критики кон пратеникот Кастриот Реџепи, кој со одлуката да не учествува на собраниската седница во четвртокот спречи паѓање на Владата.
„Тие се мафијашки филмови од некои филмови кои сме ги гледале во минатото, бела заднина, ливче хартија се чита, некоординирани изјави, нестабилен поглед. Профилот е јасен на човек којшто практично е киднапиран и под присила мора да дава такви изјави како што дава. Јас се срамам што еве такви луѓе се уште опстојуваат на политичката сцена во Македонија, ако некој мисли дека тоа беше успех се лаже…Многу граѓани очекуваат на вака мафијашка реакција на Власта да следи иста таква мафијашка реакција. Нема да се спуштиме на ниво, тие ја деградираа институцијата пратеник и го нарушија угледот на Собранието. Ние ќе работиме само во интерес на граѓаните и во периодот којшто ќе следи ќе работиме на проектите кои ги ветивме, да ја вратиме довербата кај политичарите, да не мислат дека сите сме исти“,
рече Мицкоски.
Мицкоски рече дека ВМРО-ДПМНЕ нема да прави опструкции во Собранието и повика на поддршка на нивните амандмани за донесувањето на буџетот за 2022 година.
За лидерска средба, Мицкоски рече дека не гледа што би се разговарало, иако вели, секогаш е добредојдена.
„Лидерска средба е секогаш добредојдена, но нема што да разговараме. Треба да имаме одговор што се случи со пратеникот кој беше буквално киднапиран, не можеше неговото семејство да стапи во контакт со него. Ако имате добра волја да гласате против предлогот на опозицијата дојдете во Собрание и гласајте. За мене поголем срам е што дента во Собранието пратениците од власта се бојкотираа сами себе и не знам дали има таков случај во светот. Јас би се срамел“,
рече Мицкоски.
На прашање за очекувањата околу евроинтеграциите, Мицкоски рече дека клучно е ЕУ да се одважи и да се даде зелено светло за преговори на декемврискиот самит.
„ЕУ не смее да не уценува со дополнителни отстапки и национални понижувања. Веднаш треба да се даде зелено светло за пристап во ЕУ. Процесот на преговори е долг во рамки на тој процес можеме да ги преговараме сите разлики со нашиот источен сосед, но веднаш треба ЕУ да се одважи, да му даде признание на овој народ и да почнеме преговори“,
рече Мицкоски.