Лидерот на ВМРО-ДПМНЕ, Христијан Мицкоски, побара извинување од медиумите кои објавиле дека тој поседува скриен имот. Според него, станува збор за лага и клевета и доколку за 24 часа не добие извинување, најави тужби за лаги и клевети.
„ДУИ нареди, а СДСМ исполни. Кога не можат поинаку, одлучија со брутални невистини повторно да ја нападнат мојата чест, честа на моето семејство, но и честа на семејството на мојата сестра. Семејниот дом на семејството на мојот зет, сестра и внука, создаден со продаден имот добиен како наследство и подигнат банкарски кредит да го претстават како мој скриен имот. Ниту сум купил ниту поседувам скриен имот. Денес е Прочка и јас им простувам за ова што ми го прават мене и на моето семејство и затоа имаат 24 часа медиумите блиски на ДУИ (лице вработено во кабинетот на Артан Груби) и СДСМ (Џабир Дерала) да ми се извинат за лагите кои ги објавија, а доколку тоа не го сторат, ќе ја барам правдата преку судски процес“
напиша Мицкоски на Фејсбук.
Тој во објавата на Фејсбук ги повика УЈП, МВР и Обвинителството да го проверат неговиот имот и да ги објават податоците.
„Ја повикувам Сања Лукаревска јавно да ги објави сите мои даночни пријави како директор на Управата за јавни приходи, ги повикувам Оливер Спасовски и обвинителот на ДУИ, Ислам Абази, веднаш да го проверат целиот мој имот и имотот на моето семејство и доколку констатираат нешто што не е согласно законот, веднаш да ме приведат. Затоа што набргу од денес крајот на криминалците во политиката ќе биде пеколен, јас ви ветувам“
сподели Мицкоски.