Меѓу случаите кои тој ги потенцираше е и „Талир“ во кој се суди за незаконско финансирање на ВМРО-ДПМНЕ и во кој е замрзнат имотот на партијата
Лидерот на ВМРО-ДПМНЕ, Христијан Мицкоски, вели дека кога тој ќе дојде на власт ќе следува ревизија на пресудата за случајот „27 април“, но и на други предмети, кои според него, се со диктирани обвиненија и нарачани пресуди, меѓу кои и актуелниот „Талир“ во рамки на кој е замрзнат имотот на неговата партијата.
На обвинителите и судиите, пак, им порача дека ќе бидат казнети зошто работеле под диктат на Зоран Заев и СДСМ.
„Следната влада на ВМРО-ДПМНЕ сите овие издиктирани обвиненија и нарачани судски пресуди ќе ги ревидира и врз основа на таа ревизија, која ќе ја прават колеги обвинители и судии, но кои биле чесни и не потклекнале на диктатите и нарачките на Зоран Заев и оваа власт, ќе бидат предмет на постапка сите судии кои ги прифатиле овие диктати и судски нарачани пресуди. Ќе бидат санкционира согласно законите и Уставот. Неминовна ќе биде ревизија на сите овие нарачани и под политички диктат донесени пресуди веднаш после промената на власт. Вклучително и за случајот ’27 април‘ и за други случаи“,
изјави Мицкоски.
Тој се пожали дека случајот „Талир“ каде е замрзнат имотот, не е основан бидејќи постапката била отпочната по истекот на рокот од 18 месеци кој своевремено го имаше СЈО.
„Не е само случајот ’27 април,‘ тоа е еден од случаите со огромен политички прогон, тука се и случаите кои во моментов се водат во судските лавиринти, меѓу кои и случајот против партијата чиј имот е замрзнат на неправеден и неуставен начин“,
вели Мицкоски.
Неговиот коментар доаѓа откако вчера Апелацискиот суд во Скопје одлучи за првостепената пресуда за најмасовниот предмет кој се водеше за настаните од 27 април 2017 година во Собранието и делумно ги уважи жалбите, но на сите осудени им ги потврди затворските казни, со тоа што им ги намали за една до две години.