Според премиерот Христијан Мицкоски, соговорниците имале шанса да видат поинакви политичари, кои достоинствено ги бранат интересите на државата. Претходните политичари, првиот човек на владата ги опиша како луѓе со свиткана кичма, кои велеле „Да“ на се, кои со едната рака мафтале со ЕУ и НАТО знамиња, а со другата краделе
Учеството на НАТО самитот во Вашингтон и посетата на САД од страна на премиерот, сепак, не помина целосно „мазно“. Доби критики, особено од опозицијата, што при крајот на посетата стана јасно дека со него го зел и постариот син. Потоа, Мицкоски беше критикуван од грчките претставници за употребата на старото уставно име на државата Македонија, но во исто време, неговиот грчки колега Мицотакис кажа и дека Мицкоски го користел новото уставно име, Северна Македонија, на затворните состаноци
Исклучително успешна посета која имаше интензивна агенда. Во неколу зборови, ова е одговорот на премиерот Христијан Мицкоски на новинарско прашање при неговата денешна посета на Охрид – како ја оценувата посетата на Вашингтон од економски и политички аспект?
Но, веднаш по тие први зборови во кои и даде вредносен суд за неговата и работата на министрите во Вашингтон, тој се сврти кон своите политички опоненти.
„Јас би ја оценил како исклучително успешна посета во која соговорниците имаат можност да видат поинакви политичари коишто доаѓаат оттука. Не политичари коишто на се велат „Да“, подведени, се соблазнуваат со соговорниците. Туку политичари кои имаат јасен план. Го претставивме нашиот план, кажавме што се нашите приоритети и како граѓани и како држава и мислам дека од другата страна добија информација за тоа што досега не го слушале. Ќе повторам, ние нема да бидеме политичари коишто надвор за се викаат „да, да, да“ и ја држат раката на срцето со подведена кичма. Напротив, достоинствено ќе ги браниме нашите интереси, за нешто ќе се сложиме, за нешто нема да се сложиме, тоа е она коешто е наш приоритет“,
изјави премиерот Христијан Мицкоски.
Мицкоски не навлезе во детали, а и не доби дополнително прашање за тоа кои приоритети се претставени и каде. Но, од она што го објавуваше владината прес-служба и присутните македонски новинари, некои од клучните моменти при учеството на НАТО самитот и посетата на САД беа: обеледувањето на т.н. „специјална економска соработка“ со Унгарија, најавата за нова инвестиција во сопирачки за шински возила на „Вабтек“, средбата со Ричард Гренел, висок соработник на поранешниот претседател на САД Доналд Трамп кој заговараше промена на границите на Балканот.
Македонската делегацијата застана и зад завршната декларација на НАТО самитот во која беше потврдено дека Алијансата останува посветена на безбедноста и стабилноста на Западен Балкан, но и дека Русија е главната закана по светската безбедноста. Со други зборови, немаше сигнали за промена на курсот на државата во однос на главните теми во НАТО во моментов.
Но, и не беше се мазно. Уште на стартот на посетата, опозициската СДСМ ја потсети новата Влада дека тие немаше да бидат на НАТО самитот во Вашингтон, ако претходната власта немала храброст да го постигне Договорот од Преспа, зад кој, патем, ВМРО-ДПМНЕ не застана ниту тогаш ниту сега.
Понатаму, опозицијата го критикуваше премиерот дека ја криел средбата со бугарскиот премиер. Димитар Главчев пред медиумите во детали опиша што зборувале со Мицкоски, додека Мицкоски само спомена дека се виделе, без повеќе детали за темите и исходот од разговорот. Од владејачката партија се бранеа дека нема тајни средби на јавен настан пренесуван во живо.
А тука беше и неизбежниот конфликт со Грција. Од делегацијата на јужниот сосед јавно го осудија Мицкоски дека на Самитот го користел името Македонија. Но, според зборовите на грчкиот премиер, Кирјакос Мицотакис, Мицкоски го користел новото уставно име на земјата, Северна Македонија, на затворените состаноци. Премиерот на Северна Македонија повика – дека добрососедските односи се двонасочна улица.
И на крај, своевиден скандал предизвика присуството на постариот син на премиерот Мицкоски во САД. При посетата на универзитетот „Џонс Хопкинс“, институцијата објави фотографии од посетата, а на една од нив беше премиерот Мицкоски, заедно со неговиот син и министерот за надворешни работи Тимчо Муцунски.
Еве како реагираше пратеничката на СДСМ Славјанка Петровска:
„Прво владино патување, прв скандал! Асистенотот на татко му, а сега премиер, си го зел синот во делегација во САД! Ова младо дете на фотографијата не е најдобриот студент во Македонија. Не е ниту стипендист на државата. Не е учесник на некој конкурс или јавен повик за студенти, па како награда да биде дел од државната делегација предводена од премиерот Мицкоски. Се прашувате кој е? Синот на Христијан Мицкоски“,
пишува во објавата на Петровска.
На обвинувањата од СДСМ подоцна одговорија од Министерството за надворешни работи:
„Делегацијата на Самитот на НАТО беше точно определена од страна на Алијансата и таа броеше вкупно 21 член, согласно протоколите на НАТО. Притоа, потенцираме дека Јован Мицкоски, синот на претседателот на Владата, Христијан Мицкоски не беше еден од членовите на делегацијата, иако претседателот Мицкоски имаше покана за придружба од член на семејството“,
Оттаму информираат дека за патувањето на Јован Мицкоски не се потрешени средства од буџетот на Северна Македонија и додаваат дека за дополнителни информации остануваат отворени за јавноста.
Па, дали поради секојдневните препукување додека уште траеше посетата на Вашингтон, дали поради напластениот политички анимозитет, во крајната оценка на посетата на САД на Мицкоски влезе уште една критика за опозицијата. Не само што лошо ја претставувале државата надвор, туку и дека крадале:
„А тие политичари кои надвор за викаат да со подведена кичма во едната рака мафтаат со знамето на НАТО и со ЕУ, а другата го ограбуваат народот и државата. Ние тоа нема да го правиме. Ние немаме намера македонските граѓани, ниту Македонија да ги ограбуваме. Напротив, мора да владее правото, мора институциите да се функционални, мора политичарите да бидат слуги на граѓаните, во рамките на можностите“,
изјави денеска Мицкоски од Охрид.