На фотографиите објавени на социјалната мрежа Икс, кои се објавени од грчкото МНР, се гледа дека покрај Герапетритис и премиерот Мицкоски на средбата присуствува и министерот за надворешни работи и надворешна трговија Тимчо Муцунски
Премиерот Христијан Мицкоски и шефот на грчката дипломатија Јоргос Герапетритис остварија средба на маргините самитот на Берлинскиот процес, кој денеска се одржува во Берлин, пренесува МИА повикувајќи се на фотографиите што на социјалната мрежа Икс ги објави Министерството за надворешни работи на Грција.
Од грчкото МНР на Икс информираат дека Герапетритис остварил кратки средби на кои се разменети мислења на маргините на состанокот на Берлинскиот процес.
На фотографиите се гледа дека покрај Герапетритис и премиерот Мицкоски, на средбата присуствува и министерот за надворешни работи и надворешна трговија Тимчо Муцунски.
FM George Gerapetritis had brief exchanges at #BerlinProcess Summit
— Υπουργείο Εξωτερικών (@GreeceMFA) October 14, 2024
Συναντήσεις ΥΠΕΞ Γιώργου Γεραπετρίτη στο πλαίσιο της συμμετοχής του στη Σύνοδο Κορυφής της Διαδικασίας του Βερολίνου pic.twitter.com/tXKlm25zg8
Премиерот Мицкоски ја предводи македонската делегација во Берлин на самитот на шефови на влади на земјите од Западен Балкан во рамки на Берлинскиот процес. Заедно со него во Берлин се и министерот за надворешни работи и надворешна трговија Тимчо Муцунски, министерот за внатрешни работи Панче Тошковски и министерот за европски прашања Орхан Муртезани.
Мицкоски денеска на Фејсбук напиша оти учествува на првата сесија од Берлинскиот процес, посветена на регионалната соработка и заедничкиот регионален пазар, што е форма за поблиска соработка и операционализирање на стратегијата за економски развој на државите од Балканот.
„Мора да го најдеме нашиот интерес во отворање на нови можности и пазари за нашите компании, нови форми на соработка и обезбедување на посигурна иднина“,
напиша Мицкоски.
Од Владата соопштија дека се предвидени повеќе билатерални средби на самитот на Берлинскиот процес.
Инаку, шефовите на двете дипломатии, Муцунски и Гераптритис, минатиот месец во Њујорк остварија прва средба на маргините на Генералното собрание на Обединетите нации.
На самитот на Берлинскиот процес традиционално учествуваат шесте земји од Западен Балкан, нивните земји поддржувачи Австрија, Франција, Италија, Словенија, Хрватска, Велика Британија, Полска, а од 2019 година и Грција и Бугарија, како и ротирачкото претседателство со Советот на ЕУ, Советот за регионална соработка, ЦЕФТА и Регионалната младинска канцеларија.