Мицкоски никогаш досега не бил кандидат за пратеник, освен што беше носител на листата на ВМРО-ДПМНЕ за Советот на Град Скопје во 2017 година, по што се повлече од советничкото место
Опозицискиот лидер Христијан Мицкоски по првпат ќе биде носител на листа на парламентарните избори и ќе ја предводи листата во првата изборна единица.
Мицкоски денеска од Битола најави дека ќе биде носител на првата изборна единица на листите на ВМРО-ДПМНЕ и коалицијата на претстојните парламентарни избори, кои треба да се одржат следната година.
„Сè уште не сме ги определиле носители официјално, иако јас самиот себеси се претставив како потенцијален носител во првата изборна единица. Набрзо од денеска јавноста ќе ги знае носителите во другите изборни единици. Исто така, се подготвуваме за конвенцијата за избор на претседателски кандидат зад кој ќе застанат ВМРО-ДПМНЕ и коалицијата“,
рече Мицкоски.
Инаку, Мицкоски во 2020 година изјави дека не е расположен да биде кандидат за пратеник ниту носител на листа на претстојните избори, затоа што, како што неколкупати изјавуваше, е доследен на идејата за „шпицен-кандидат“ за мандатар за состав на идната влада.
Тој во 2020 година беше кандидат за премиер од неговата партија.
„Ние и во минатото имавме предлог до партиите за т.н. шпицен кандидат и гледаме дека од ДУИ ја прифатиле оваа идеја за таква понуда. ВМРО-ДПМНЕ беа јасни кој е кандидат за премиер, а тоа сум јас, СДСМ исто така го номинираше Зоран Заев. Името на третиот се уште не сме го слушнале, се надевам ќе го кажат деновиве. Народот е тој што одлучува кој ќе ја предводи владата“,
рече тогаш Мицкоски.
Претходниот лидер на ВМРО-ДПМНЕ Никола Груевски редовно беше носител на листа, почнувајќи од 2002 година, а од 2006 до 2014 г. се повлекуваше од пратеничкото место за да биде премиер. Мицкоски, пак, никогаш досега не бил кандидат за пратеник, освен што беше носител на листата на ВМРО-ДПМНЕ за Советот на Град Скопје во 2017 година, по што се повлече од советничкото место.