Владејачкиот СДСМ, пак, го обвинува дека е против здравствениот систем и интересите на граѓаните и го прашува кои му се вистинските мотиви за ваквите ставови – дали се противи затоа што Клинички центар не се гради на имот на Сергеј Самсоненко, партнер на Орце Камчев?
Лидерот на ВМРО-ДПМНЕ, Христијан Мицкоски, вели дека неговата партија никогаш нема да го поддржи проектот за нов Клинички центар на власта и побара да се поддржи тој што го имаат тие – обновување за постојниот и спојување на Воена болница со болницата „Букурешт“.
Во денешната изјава за медиумите тој обвини дека власта нема вистинки проект, а сака да потроши над 500 милиони долари, додека од друга страна, вели, ВМРО-ДПМНЕ веќе имаат проект кој може да се реализира.
„Ние како политичка партија, не можеме да дозволиме најкорумпираната власт во Европа да потроши 508 милиони евра народни пари само за триесетина страни физибилити студија. Кога власта ќе има подготвен и реален проект, проект кој може да добие своја финализација, тогаш ВМРО-ДПМНЕ ќе поддржи изградба на Клинички центар. Ние како ВМРО-ДПМНЕ веќе имаме идејно решение и проект кој опфаќа ревитализација на постојниот Клинички центар ’Мајка Тереза‘, изградба на Ковид-центар и спојување со постоечката Воена болница, како и со болницата ’Букурешт‘, а дополнително на тоа и вложување средства во три универзитетски клинички болници како што се болниците во Штип, Битола и Тетово“, изјави Мицкоски додавајќи дека ако Владата е заинтересирана за вложување во јавното здравство, тогаш нека го поддржи нивниот проект.
Во реакцијата на ставовите на лидерот на ВМРО-ДПМНЕ, социјалдемократите, пак, велат дека уште еднаш опозицискиот лидер потврдил дека е против интересите на граѓаните и против здравствените работници.
„Заради лични мотиви Мицкоски преку пратениците на ВМРО-ДПМНЕ го блокира Законот со кој државата ќе добие нов Клинички центар после 80 години. Мицкоски треба да одговори дали мотивите за ваквото негово однесување е тоа што новиот Клинички центар не се гради на имотот на Сергеј Самсоненко партнер на тајкунот на ВМРО-ДПМНЕ, Орце Камчев? Мицкоски и ВМРО-ДПМНЕ шират лажни вести за наводни криминали и скандали за да спречат капитален проект во интерес на сите граѓани и здравствениот систем“,
велат од СДСМ.