Лидерот на ВМРО-ДПМНЕ, Христијан Мицкоски, е убеден дека на 12 април ќе има предвремени избори, а ако Собранието не се распушти до недела, според него, ќе настапи сериозна политичка криза.
„Убеден сум дека ќе се одржат изборите на 12 април. Ако не се распушти Собранието до недела, влегуваме во сериозна политичка криза“,
рече Мицкоски во интервју за „Алфа“ одговарајќи на прашањето дали по барањето за разрешување на министерката за труд и социјална политика Рашела Мизрахи е можно да се случи пресврт и да се доведе во прашање одржувањето на изборите.
Образложувајќи ја одлуката неговата партија сепак да не го напушти Собранието, иако тој самиот ја отвори таа можност, Мицкоски рече дека доколку неговата партија се одлучела на таков чекор експресно ќе биле изгласани, не само законот за ЈО туку и други закони од кои, според Мицкоски, ќе профитира семејството на Заев.
„Најсреќен ќе беше Зоран Заев да го напуштевме ние денеска парламентот, сите оние закони за марихуана ќе си поминеа. Најсреќен тој ќе беше ние вчера да завршевме со изјава после ИК на партијата дека го напуштаме парламентот. Сите, верувајте, денеска на брза лента ќе влезеа сите закони, не закон за обвинителство туку оние закони што ќе донесеа пари во фамилијата“,
рече лидерот на ВМРО-ДПМНЕ.
Говорејќи за причините зошто за него не е прифатлив предложениот закон за ЈО, тој повторно го спомена членот 110 каде што, како што рече, „стои јасна амнестија на кривични дела или, пак, кривични дела што се поткрепени со докази на стекнат материјал како што е снимање итн“.