Според Мицкоски, државата е подготвена позитивно да одговори за да се најде конструктивно решение, но во спротивно „можам да заклучам дека ние како држава, Балканот, за жал не сме во фокусот на оваа администрација на Брисел“
Како држава ќе продолжиме да промовираме европски вредности и ќе си ја вршиме домашната задача. Ако од Брисел се подготвени да најдеме конструктивно решение и да го продолжиме патот, секогаш сме тука позитивно да одговориме на таквото барање. Во спротивно, можам да заклучам дека ние како држава, Балканот, за жал не сме во фокусот на оваа администрација на Брисел. Ова е ставот што премиерот Христијан Мицкоски денеска го истакна како одговор на новинарско прашање дали очекува некое поместување во делот на пристапувањето на земјата кон ЕУ пред неговото заминување во Брисел во вторник.
Мицкоски рече дека државата има целосно усогласена надворешна и одбранбена политика со ЕУ и оти министерот за надворешни работи и надворешна трговија Тимчо Муцунски тоа го потпишал со високиот претставник на ЕУ.
„Реформите ги правиме согласно мониторингот на Европа и така и ќе продолжиме. Ние не сме опасност, ние сме под чадорот на ЕУ и бидејќи таму има политичари во Брисел кои одлучија да бидат заложници на политичари кои сè уште се со мислите во средниот век, наместо да гледаат кон 21 и 22 век, ние повеќе отстапки немаме намера да правиме додека сме влада. Ако си најдат некоја друга влада, нека си ја донесат, нека си прави таа отстапки. Ова влада такви отстапки нема да прави затоа што не е аргументот – тоа е тоа, знаете 27 се така. Тој аргумент не води таму каде што сме денеска, ја води ЕУ таму каде што не треба да ја води“,
речи Мицкоски, кој денеска присуствуваше на поставување камен-темелник на доградба на детска градинка во селото Таринци во Општина Карбинци.
Според него, секојдневно во ЕУ, една на друга земја, по принципот на Бугарија, а во минатото и на Грција, си ставаат вето. Прашањето, како што е рече, е дали ако еднаш направите преседан, потоа тој преседан станува пракса. Гледаме, истакна Мицкоски, дека таму тоа станува пракса и ја води ЕУ таму каде што не треба, секој ден некој некому поставува вето и поставува некаков ултиматум и тоа не е добро.
Мицкоски во вторник ќе биде дел од редовниот самит Европска Унија-Западен Балкан.
Претходно, на почетокот од месецот, Мицкоски беше во Брисел на работна вечера што за лидерите од земјите од регионот на Западен Балкан ја организира новиот претседател на Европскиот совет, Антонио Кошта.
Вечерата со лидерите од регионот беше подготовка за претстојниот самит ЕУ-Западен Балкан што ќе се одржи на 18 декември и со кој Кошта првпат ќе претседава.
По враќањето од Брисел, Мицкоски рече дека имал исклучително квалитетни средби со новата комесарка за проширување Марта Кос, со новиот претседателот на Европскиот совет, Антонио Кошта, како и со директорот на Генералниот директорат за соседска политика и преговори за проширување при Европската комисија (ГД НЕАР), Герт Јан Копман.
Тој рече дека на средбите разговарале за сите теми што се од суштинско значење. На средбите со Кос и со Кошта, Мицкоски рече дека ги реафирмирал ставовите дека ултиматуми не прифаќаат, но дека како влада се подготвени да разговараат.