Адвокатот и основач на здружението за канабис и зелени политики „Билка“, Јанаки Митровски, во дебата на „360 Степени“, зборуваше за моделите на легализација и декриминализација на канабисот.
– И јас лично и здружението во коешто сум, се залагаме за еден модел на легализација на канабис којшто задолжително ќе има поголема инклузија на што поширок круг на граѓани – рече Митровски.
Тој рече дека е погрешна перцепцијата дека во Македонија канабисот е легализран во медицински цели. Тој вели дека канабисот е приватизиран и корист има само големиот бизнис, и најголемиот дел од фирмите се концентирани исклучиво за извоз.
– Тоа доведе до една неприродна и парадоксална ситуација, да ако јас имам милион евра и добри политички врски, можам да имам неограничен број на растенија во мојот посед и да ме викаат бизнисмен, а доколку имам, да речеме, болна мајка, пример, мојата мајка почина од канцер… и немам финансиски средства да набавувам легално или од црниот пазар, и се одлучам да засадам 5-6 растенија строго за изработка на канабис за медицински цели, тогаш ќе се најдам под жесток прогон – рече Митровски.
Тој рече дека првиот чекор на кој ќе инсистираат е декриминализација на канабисот за лична употреба
– За мене лична употреба е 30 грама канабис, што би била некоја месечна количина, по 1 грам, односно 1 цигара дневно, да конзумирате. Говориме кога нема други елементи за продажба – рече Митровски.
Тој рече дека во економскиот дел се залагаат за целосна легализација на канабисот и задолжителна инклузија на македонскиот земјоделец и треба да се размислува што со земјоделците при влез во ЕУ. Митровски рече дека во бизнисот треба да се форсираат мали и микро претпријатија.