Претседателот на Собранието вели дека лично нема да дозволи да има гласање за последниот член на ДИК, без притоа да добие цврсто уверување дека веќе има обезбедено двотретинско мнозинство за еден од кандидатите, бидејќи доколку изборот пропадне, целиот процес започнува одново, а вели – доколку не се избере нов член, ќе биде фрлена дамка на изборниот процес
Претпоставувам дека препораката платеното политичко рекламирање повеќе да не биде на товар на државниот буџет е причина зошто измените на Изборниот законик се уште не се на дневен ред пред пратениците, бидејќи не гледам проблем во препораките на ОБСЕ-ОДИХР – вели претседателот на Собранието, Јован Митрески, во интервју за „360 степени“ на МРТ 1.
Министерството за правда на 11 декември 2023 година соопшти дека работната група што ја формираше овој ресор ги подготвила измените на Изборниот законик и дека министерот Кренар Лога го поддржува предлогот платеното политичко рекламирање да не биде повеќе на товар на државата.
„Со оглед на тоа што на лидерска средба е договорено овој законик да оди во Собранието преку пратеници, Министерството за правда ќе ја достави работната верзија до сите парламентарни политички партии. Одговорноста за донесувањето и содржината на Изборниот законик ќе биде на пратениците во Собранието на РСМ“,
соопштија тогаш од Правда.
Митрески, во гостувањето во „360 степени“ вели дека како претседател има задача предлогот што ќе стигне од пратениците да го стави на седница.
„Претпоставувам дека тука некаде е темата, бидејќи не гледам проблем во препораките на ОБСЕ-ОДИХР, досега не сум слушнал дека некој реагира на тие препораки. Претпоставувам дека за тој дел станува збор, но како и да е треба да се обезбеди консензус. Секако, Изборниот законик и финансирањето на кампањите од државниот буџет беше тема години наназад и тогаш кога се носеше таа одлука објаснувањето беше – да се финансираат од државниот буџет за да нема надворешни влијанија во партиите, да не дава некакви концесии кон одредени финансиери во однос на изборната кампања или по завршувањето на изборите. Тогаш логиката беше таа, но доколку партиите обезбедат консензус, ќе го почитуваме тоа“,
рече Митрески.
Кога станува збор за пополнување на испразнетото место во Државната изборна комисија и бојкотот на Собранието од опозициските партии на Албанците поради тоа што сметаат дека таа позиција им припаѓа ним, Митрески вели дека тој остварил средба со нив веднаш по преземањето на функцијата и дека разговарал за да се надмине овој проблем. Собранискиот спикер вели дека проблемот е во читањето на законот бидејќи не може точно да се одреди која партија спаѓа во опозициската гарнитура.
„БЕСА влегла со коалицијата ’Можеме’, па излегла, па влегла Алтернатива која била во коалиција со Алијанса, па излегла. Јас побарав од нив тие два предлози што се на Комисија за избори и именувања да дојдат до пленум за да ја отвориме дебатата во пленарната сала и да се најде начин да разговараат пратениците, па и политичките партии, за да обезбедиме 80 гласа за еден од кандидатите. Изборот на кандидат за ДИК се врши со двотретинско мнозинство така што тука не може да дојде до ситуација за надгласување дали ќе биде еден кандидат или ќе биде друг. На крај, треба да се седне и да се разговара“,
кажа Митрески.
Тој вели дека лично нема да дозволи да има гласање за последниот член на комисијата, без притоа да добие цврсто уверување дека веќе има обезбедено двотретинско мнозинство за еден од кандидатите, бидејќи доколку изборот пропадне, целиот процес започнува одново, а вели – доколку не се избере нов член, ќе биде фрлена дамка на изборниот процес.