Во однос на коалициите за изборите, Митрески потенцира дека се прават анализи и разговори со партиите и оти сѐ уште немаат донесено никаква одлука
Претседателот на Собранието, Јован Митрески, кој беше досегашен координатор на пратеничката група на СДСМ, во вечерашното гостување на „Тема на денот“ во Дневникот на телевизија Сител, изјави дека на вчерашната средба со пратениците од опозициските партии на Албанците, здружени во коалицијата „Европски сојуз за промени“, предложил од Комисијата за прашањата на изборите и именувањата на пленарна седница да стигнат двата предлога за избор на член на Државната изборна комисија и да се донесе ситуацијата до обезбедување на двотретинско мнозинство.
„Избирањето на членот на ДИК е важно, затоа што тоа е многу битно да не оставиме никаква флека во смисла на организирање на фер и демократски избори. Јас кажав дека во наредните неколку дена ќе пробам да разговарам со сите пратенички групи, конечно да изнајдеме решение за ова прашање. Зошто? Затоа што изборот на член на ДИК се врши со двотретинско мнозинство. Ниту власт, ниту опозиција ако не застанеме и не обезбедиме консензус, нема да обезбедиме двотретинско мнозинство. Јас предложив дека е добро за да го придвижиме процесот, од Комисијата за прашањата на изборите и именувањата до пленумот да дојдат двата предлога и да разговараме за двата предлога и да ја донесеме ситуацијата до чин на гласање, фактички до обезбедување на двотретинско мнозинство“,
рече Митрески.
Во однос на коалициите за изборите, Митрески потенцира дека се прават анализи и разговори со партиите и оти сѐ уште немаат донесено никаква одлука.
„Секако дека се прават анализи. Секако дека има разговори. Моментално нема никаква одлука како тоа ќе се спроведе на изборите, затоа што се прават анализите. Јас очекувам дека граѓаните на крајот ќе одберат иднина којашто е европска, иднина која ќе обезбедува подобра егзистенција, иднина кон демократскиот свет кон кој ние целиме како млада демократска држава која уште треба да работи на тоа прашање. Ценам дека на крајот, друга алтернатива освен европската ние немаме, затоа што досега не сме слушнале друга алтернатива некој да понуди“,
рече претседателот на Собранието.
Спикерот нагласи дека добиле допис оти сите предлог-закони потпишани од претходниот премиер Димитар Ковачевски остануваат во иста процедура.
„Значи, такви случаи имало и претходно. И во овој мандат на Собранието имаше промени на три влади. Процедурата е тоа што се обраќаме до Владата, кажуваме кои се законите, тие се обраќаат до нас и кажуваат дали остануваат на текстот на законите со новите повереници, фактички, во овој случај нови повереници се и дополнителните заменици министри од соодветните министерства. Во текот на вчерашниот ден добив допис дека остануваат на сите закони кои до тогаш биле предложени. Сите предлог-закони остануваат во иста процедура“,
рче Митрески.
Митрески информира дека Законот за бранители, кој е поднесен од претседателот на политичката партија Достоинство на Стојанче Ангелов, преку ВМРО-ДПМНЕ, е во фаза на превод и побарал од службите во најбрз можен рок да биде преведен за, како што вели, да може да биде ставен на дневен ред на првата пленарна седница закажана на 7 февруари. Тој посочи дека конечната одлука за поддршка на тој закон ќе ја носат на координацијата на пратеничката група на СДСМ.
Во врска со посебниот третман на новинари од Косово и Албанија на денот на избирање на техничката влада во парламентот, Митрески рече дека неколку минути пред почнување на седницата бил информиран дека има голема заинтересираност за присуство во галеријата и посочи оти „дал насоки да се обезбедат човечки услови за функционирање на галеријата, во смисла да се отворат сите можни простории таму за да можат новинарите непречено да ја вршат својата улога“.
„Во текот на вчерашниот ден и на првата координација кажав тој простор од галеријата да биде отворен нон стоп во целиот период, сѐ доколку нема најавено претставнци од дипломатскиот кор или присуство на луѓе од кабинетот на претседателот. Значи, и тогаш и тој ден и во иднина секогаш целата галерија ќе биде отворена за новинарите затоа што сметам дека треба да имаат пристојни услови за функцонирање. Инаку, истиот ден беше изборот на замениците министри и дополителните заменици министри, каде што, пак, горе во галеријата секогаш кога се бираат заменици и дополнителни заменици министри, се ставаат седиштата, фактички тие седат во галеријата, а не долу во пленарната сала каде што седат министрите при нивниот избор“,
рече тој.
Во однос на тоа дека ВМРО-ДПМНЕ не учествуваше ниту на првата координација во понеделникот, Митрески нагласи дека ќе направи сѐ за да се обезбеди нормално функционирање на Собранието.
„Ќе направам сѐ за да бидам во комуникација со сите пратеници, нормално, со акцент на опозицијата затоа што сметам дека мора да има комуникација. Но, исто така мора да кажам дека таа комуникација мора да биде двострана. Таа е двострана улица. Кажав и повторувам, ќе ги направам сите напори, ќе направам се што е во насока на комуникацијата за да се обезбеди нормално и ефикасно функцонирање на Собранието во овој период“,
рече спикерот Митрески.