На синоќешната седница на Владата на дневен ред се нашол предлогот на Министерството за правда за измени во Законот за прекршоци со кои се предвидува зголемување на казните и до 20 пати за загадување на животната средина.
„Усогласувањето на прописите од областа на животната средина со постојниот Закон за прекршоци ќе доведе до намалување на постојните прекршочни санкции, а поради потребата од регулирање на потребни стандарди со прописите од областа на животната средина, се избегнува намалувањето на висината на прекршоците од причини што е потребно заострување на казнената политика во областа на животната средина“,
појаснуваат од Владата.
Исто така, Министерството за правда предлага и измени на Законот за финансирање на политичките партии со кои се уредува начинот и постапката за обезбедување на финансии, располагање со нив, како и контрола на финансирањето и финансиското работење на политичките партии.
„Согласно Законот за финансирање на политичките партии процентот за исплата на средства е 0,15% од основните приходи на Буџетот на Република Северна Македонија во тековната година. Предлог-законот е потребен заради усогласеност со претходно донесени уредби“,
велат од Владата.
Предлог-законските измени треба да бидат усвоени и во Собранието.