Иако сè уште во Владата нема дефинитивен договор за ова прашање, првиот човек на ресорот здравство изразува оптимизам дека наскоро ќе се најде решение за колективен договор, кој ќе го опфати целиот медицински персонал
Оваа недела ќе седнеме со премиерот и со министерката за финансии и ќе го разгледаме колективниот договор со кој би го решиле прашањето со медицинските работници барем за наредните десет години, вели министерот за здравство Арбен Таравари во интервју за „360 степени“ на МРТ 1.
„Ние сме во преговори со сите здравствени синдикати и се надевам дека набргу ќе седнеме, мораме да седнеме со премиерот и да се договориме за колективниот договор којшто би бил решение за сите здравствени работници. И тоа е решение за следните десет години, да немаме главоболки со медицинските работници. Јас се надевам дека неделава ќе седнеме и со министерката за финансии и со премиерот и со здравствените синдикати за евентуално да се договориме. Секако дека ќе има покачување на платите, посебно кај средномедицинскиот персонал“,
најави Таравари.
Иако сè уште во Владата нема дефинитивен договор за ова прашање, првиот човек на ресорот здравство изразува оптимизам дека ќе се најде решение за колективниот договор, кој ќе го опфати целиот медицински персонал.
Таравари уште најави и дека очекува најмалку 1 800 вработувања во првата година од владеењето на коалицијата ВМРО-ДПМНЕ, „Вреди“ и ЗНАМ.
„Гледам дека има добро расположение кај премиерот да се изнајде решение за ’договорците’ коишто се така ангажирани со години. Има луѓе коишто се по пет до десет години ’договорци’. Работат во здравство со плати коишто се под минималната и мислам дека е греота за тие луѓе. Мораме да изнајдеме решение и ние се обидуваме. Се надевам дека набрзо и тоа ќе го кажеме дефинитивно дали ќе биде“,
вели министерот за здравство.
Па, ги образложува неговите гледишта за вработувањата.
„Јас сум оптимист дека ќе ја завршиме оваа работа. За 600 доктори специјализанти, тие што протестираа десет години, веќе има решение и оваа година ќе се вработат 300 и идната година уште 300. Тоа се вкупно 600 доктори, тоа е огромен ’буст’ за јавното здравство. И ако успееме 1 200 средномедицински кадар, генерално ќе бидат болничари, хигиеничари, сестри, лаборанти, тоа е 1 800 вработувања“,
рече тој.