Од друга страна, таа го поддржува Законот за нефер трговски практики бидејќи, како што рече, тој повеќе ќе го регулира пазарот отколку „овие математики што ги правиме“. Според неа, со Законот за нефер трговски практики, кој беше донесен во март, а стапи во сила на крајот на минатиот месец, многу поедноставно може да се следи и да се проверува она што значи замрзнување цени
Министерката за финансии Гордана Димитриеска-Кочоска денеска потврди дека на владината седница на која се носела одлуката за ограничување на бруто-профитните маржи била против ваквата мерка и дека сè уште стои на овој став.
Одговарајќи на новинарско прашање на денешната прес-конференција, на која ги презентираше резултатите за сработеното во првите 100 дена од нејзиниот мандат како чувар на државната каса, таа не сакаше да каже кој инсистирал на седницата на Влада да се воведе оваа мерка и за тоа ги упати новинарите да прашаат во Владата.
„Но, можам да кажам дека јас бев против и кажав дека не се согласувам и сè уште стојам на ставот дека сум против замрзнување маржи и сметам дека не носат никакви резултати, повторно само поради една причина, затоа што сметам дека немаме доволно стручни лица што ќе можат да ги следат овие, ајде да кажеме, анализи и пресметки што дополнително се прават од надлежните институции или од инспекторите кога излегуваат на терен“,
рече министерката за финансии.
Од друга страна, таа кажа дека го поддржува Законот за нефер трговски практики бидејќи, како што рече, тој повеќе ќе го регулира пазарот отколку „овие математики што ги правиме“.
Според неа, со Законот за нефер трговски практики, кој беше донесен во март, а стапи во сила на крајот на минатиот месец, многу поедноставно може да се следи и да се проверува она што значи замрзнување на цени.
„Јас ги погледнав билансите, побарав, седнав со надлежните, иако моето министерство не е ресорно за таа работа, компаниите инсистираа да се видиме, јас ги примив, потоа донесоа биланси, потоа седнав со надлежните институции да разговарам и врз основа на тоа што го увидов пак стојам на ставот дека оваа методологија не треба да се применува, можеби има друг начин и ако сакаме да замрзнуваме цени, еве во разговорите со унгарската влада што ги имавме кога беа тука, тие имаат една, сега не ја практикуваат затоа што им е мирна инфлацијата и ниска, но некогаш ја користеле и за мене е тоа многу поприфатливо и посоодветно решение доколку веќе се пристапи кон такво нешто. Тие имале попуст, така го викаат, три месеци наназад да прават просек и врз основа на таа цена оделе со на пример 20 проценти попуст, ама на конечната цена, а не вака со трговски маржи, па што признаваат, па што не признаваат“,
образложи Димитриеска-Кочоска.
Во однос на најавената мерка за сезонски и празнични потрошувачките кошнички со намалени цени, министерката вели дека и тука го кажала својот став. Таа вели дека нема сомнеж дека за празниците има поскапување на одредени производи, но оти и тука надлежните треба да најдат поедноставен начин на кој ќе вршат контроли, како и да се води сметка да не му се наштети на приватниот сектор.
„Јас им го кажав мојот став и во однос на оваа мерка и во однос на следните. Видете, повеќе се согласувам дека кога имаме празници ни се случуваат одредени работи во делот на поскапување на одредени производи и тука воопшто немам дилема, но треба да најдат некој поедноставен метод каде што навистина ќе можат да ги контролираат работите, а притоа нормално да не нанесат штета и на приватниот сектор“,
изјави Димитриеска-Кочоска.
Прашана кое е поефктивното решение што таа го понудила, кога веќе е категорично против мерката за ограничувањето на маржите, во ситуација кога притисокот од граѓаните е голем поради високите цени, министерката за финансии рече дека суштината е во тоа кои цени се високи. Според неа, најголемиот проблем се цените на зелените пазари.
Причината за тоа, според министерката, е сè понамаленото производство на земјоделски производи, што не кореспондира со големите средства што државата ги одвојува за субвенции.
„И во овој момент граѓаните кога работат и кога подготвуваат зимници, тука е најголемиот ефект, е тука е проблемот. Е, сега да се прашаме, јас тоа би го врзала со нешто, затоа што ова е комплексно прашање, не се решава само со замрзнување на цени во еден месец и носење одлука на Влада. Како стигнавме до толку високи цени на земјоделските производи, се помалку произведуваме, тоа е првиот проблем, колку субвенции трошиме. Токму од таа причина треба да се направат анализи и мислам дека Министерството за земјоделство веќе е во процедура за измена на методологиите како се распределуваат тие субвенции затоа што трошиме ненормално многу средства за нешто што очигледно не дава ефект, цените и понатаму растат и кај нас проблемот се земјоделските производи. За жал од година во година имаме сè помало производство на земјоделски производи и сè поголем увоз“,
рече министерката за финансии на денешната прес-конференција.