Тој рече дека со државните сертификати имаат пристап до секоја државна тајна, колку и да е класифициран тој документ и праша зошто еден политичар што води државна институција не им дозволува увид во ваков документ
Ваквиот пристап, според мене, е провизорен, повеќе е формален, а во него има помалку суштина. Вака претседателот на Комисијата за надворешна политика на Собранието Антонијо Милошоски реагираше по реферирањето на министерот за надворешни работи Бујар Османи за преговорите со Бугарија.
„Министерот Османи зборуваше да изградиме заеднички позиции, зборуваше за зрелост, почит и меѓусебна доверба. Како ние да имаме доверба како пратеници кои ги избрал народот, пратениците ја избрале Владата, а Владата не сака со нас да сподели еден нон-пејпер кој во декември бил испратен во Софија“,
праша Милошоски
Тој рече дека со државните сертификати имаат пристап до секоја државна тајна, колку и да е класифициран тој документ, и праша зошто еден политичар што води државна институција не им дозволува увид во ваков документ.
„Еве, можеби вие немате доверба во мене, можеби Никола Димитров нема доверба во вас, можеби граѓаните немаат доверба во Владата, но зошто вие да немате доверба во пратеници на СДСМ и ДУИ, и тие се пратеници и ве гласале, со нив барем да споделите што има во тој нон-пејпер“,
рече Милошоски.
Тој посочи дека Османи прави нов преседан со тоа што потврдува дека има документ, дека тој е неформален, е во работна верзија, а ја ускратува можноста пратеници да го дадат својот придонес во тоа.
„Втора работа што сакам да ја спомена е дека зборувавте за одлуката од март 2020 година за почеток на преговорите. Но, кога таа одлука беше донесена и вие лично на прес-конференција пред македонската јавност со Никола Димитров и Оливер Спасовски, како тогашен технички премиер, кажавте дека одлуката е безусловна, а гледаме дека сега има 5+1, 3+1, 2+1 имаме услови што задираат дотаму што одат до Уставот на Република Македонија, кој е темел на политичкиот суверенитет на една држава“,
појасни Милошоски.
Како трето прашање, Милошоски ги истакна идентитетот и јазикот.
„На крајот од краиштата, ако има добра волја и ова е за интерес и на Македонија, и на Бугарија ,и на Европската Унија, тогаш зошто новата бугарска влада, ако има навистина поинакви гледишта, не прифати да го потпише Договорот помеѓу Македонија и Фронтекст“,
рече Милошоски.