Тоа што беа измешани законите при приведувањето на бизнисменот Орце Камчев, за обвинителката Вилма Русковска, која е шефица на Обвинителството за гонење организиран криминал, е лапсус на полицијата кој нема да влијае на предметот.
„Се гледа дека е лапсус, грешка, тоа се однесува на членовите за приведување и задржување на лица. Тоа не може да биде проблем“,
вели Русковска за емисијата „Стадион“ на Канал 77 и додава дека нејзин став е нема да ја отежни работата, но за тоа ќе цени судот.
Камчев беше приведен на 12 март во рамки на истрагата за предметот „Плацови на Водно“ каде е еден од осомничените. Тогаш неговата одбрана реагираше дека тој бил лишен од слобода за една работа (изборна измама), а дека потоа му е одреден притвор за нешто друго (опасност од бегство).
Она што се воспостави понатаму, како и денеска од изјавата на Русковска, е дека се измешани Кривичниот законик (КЗ) и Законот за кривична постапка (ЗКП). Имено, ако се отвори КЗ и се побараат делата како „изборна измама“ и „повреда на тајноста на гласањето“, ќе се најдат во членовите од 158 до 165 во КЗ. Ако, пак, се отвори ЗКП и се побараат категориите лишување од слобода, притвор и основи за изрекување притвор, ќе се најдат во членовите од 158 до 165 за ЗКП.
„Агенцијата за национална безбедност (АНБ) колку што ми е мене познато, доставила известување до полиција и полицијата постапувала согласно известувањето од агенцијата затоа што припадниците на АНБ немаат полициски овластувања. Толку ми е мене познато, а полицискиот службеник за прифат, така се вика според законот, ги измешал законите, наместо ЗКП напишал КЗ“,
вели Русковска.
Таа потенцираше и дека нема ништо спорно што обвинителката Лиле Стефанова, која формално се води како обвинителка во ОЈО Радовиш, постапува во предметот бидејќи републичкиот обвинител Љубомир Јовески ѝ дал овластување уште кога се отворила истрагата.