Владата да ги преземе од општина Струга сите надлежности кои се однесуваат на урбанизмот – пишува во писмото кое до Илинденска 2 го испрати струшкиот градоначалник Рамиз Мерко. Освен до премиерот Зоран Заев, писмото е испратено и до повеќемина високи владини функционери во кое струшкиот градски татко во детали наведува државата, а не тој, да бидат надлежни за издавањето дозволи за градба, легализацијата на објекти, концесиита и спроведувањето на забелешките од страна на УНЕСКО на владините институции.
„Имајќи ја предвид мојата отвореност и транспарентност како човек кој доаѓа од бизнис заедницата за кој последните случувања и неможноста да им излезам во пресрет на бизнис заедницата и граѓаните на општина Струга и да им помогнам да го развиеме нашиот град и да опстоиме во неговиот развој и во насока на спроведување на законите на РСМ, како градоначалник на Општина Струга имајќи ги предвид и последните случувања и политичката состојба во државата одлучив да Ви ги отстапам ингеренциите во областа на урбанизмот во делот на издавање дозволи за градба, легализација на објекти, концесии како и во делот на спроведување на забелешките од страна на УНЕСКО. Се надевам дека Вие како централна власт со вашите капацитети ќе имате подобро разбирање и визија за потребите на бизнис заедницата и општина Струга“,
стои во писмото на Мерко.
Мерко смета дека против него како градоначалник и Струга како општина се води црна кампања, се’ со цел да се прикријат проблемите кои со дивоградбите ги има Охрид. Иако „етикетата“ ја лепи на грбот на Охрид, и самиот пред неколку дена во тој град отвори една дивоградба – пицеријата на советникот и негов сопартиец Нефи Усеини. Освен што го „куди“ Охрид, во дописот до Владата, Мерко се претставува и како совесен урбанист и еколог, иако од граѓанските организации повеќе пати беше обвинуван дека директно им штети на природните убавини на Струга.
„Струга и граѓаните веќе подолго време се изложени на континуирани и неоправдани медиумски и политички напади дека се што се работи во Струга е надвор од Законските одредби и спротивно на интересите на државата, односно интересите на УНЕСКО. Имајќи ја предвид оваа состојба и фактичката состојба во Струга, која укажува на фактот дека и пред моето доаѓање на власт, како и од доаѓањето на власт навака не е изградена ниту една дивоградба, а најмалку е направена узурпација на државно земјиште или нанесување на штета на еколошката состојба во градот“,
се вели понатаму во писмото.
На крајот, заклучува Мерко, од целата ситуација ќе трпи целата општина и туризмот во неа.
Од Владата велат дека, барем засега, писмото не е стигнато кај нив.