Пратеничката и портпаролка на владејачката партија денеска на прес-конференција изјави дека државната компанија за донации и спонзорства за годинава предвидела 200 000 евра, а потрошила околу 370 000 евра, од кои дел завршиле во фитнес-клуб, спортски клубови и стоматолошко здружение
Владејачката ВМРО-ДПМНЕ денеска излезе со тврдења дека државната АД МЕПСО годинава потрошила речиси двојно повеќе од средствата предвидени за донации и спонзорства, а дел од парите, според партијата, завршувале во спортски клубови.
Пратеничката, портпаролка и член на Извршниот комитет на ВМРО-ДПМНЕ, Марија Митева, на прес-конференција рече дека денеска и утре ќе објават „зошто енергетскиот сектор во Македонија е на дното и како и на кој начин се трошеле државните пари“.
„Пред да започнеме со деталите, да ја потсетиме јавноста само на последниот скандал – 14 милиони евра долг отпиша претходното раководство на МЕПСО. 14 милиони евра долг беше отпишан затоа што должник е синот на Муса Џафери и други блиски фирми на СДС и ДУИ“,
рече Митева.
Во однос на донациите и спонзорствата, таа рече дека согласно план и анализа АД МЕПСО за 2024 година предвидел вкупно 12 300 000 денари или околу 200 000 евра, а потрошила 22 712 500 денари или околу 370 000 евра.
Според Митева, 200 000 денари завршиле во фитнес-клуб „Динамик“ Скопје, а 100 000 денари како донација добило и Македонско стоматолошко друштво МСД Скопје.
„Зошто и каква е поврзаноста на надлежноста на МЕПСО со донации и спонзорства на фитнес-клуб?“,
праша портпаролката и пратеничка на ВМРО-ДПМНЕ.
Таа денеска наведе уште два случаи, каде според ВМРО-ДПМНЕ, Македонскиот електропреносен систем оператор дал пари како донации и спонзорства.
„Примател на донација или спонзорство е и Шкендија-Арачиново со исплата на 08.3.2024 во износ од 300 000 денари. Дали раководството на АД МЕПСО добило карти во ложа за да го проследи натпреварот за цела сезона на овој клуб? Или, пак, на КК Башким? Затоа што и за овој клуб се доделени средства во износ од 250 000 денари во месец март оваа година?“,
рече Митева.
Таа обвини дека токму поради ваквото трошење без усул, цел и план што зад себе го оставила претходната влада на СДСМ и ДУИ, енергетскиот секторот во Македонија е на дното. Затоа, како што додаде, Митева, имало покачување на сметките за струја и земјава нема стабилен енергетски систем.
„Двете клучни функции на АД МЕПСО се пренос на електрична енергија и управување со електропреносниот систем. Основна дејност на МЕПСО е оптимален и одржлив развој на електропреносниот систем со цел да се задоволат потребите од електрична енергија на корисниците со минимални трошоци и секако со задоволување на еколошките барања во државата. Затоа Македонија немаше стабилен енергетски систем, затоа имавме покачување на сметките на електрична енергија, затоа бевме ограбена држава. Затоа што наместо за граѓаните народните пари се трошеле ненаменски и залудно. Утре продолжуваме со објавување на листата за донации и спонзорства, а за ова одговорност мора да има!“,
порача Митева.
Инаку, на крајот на јули, по смената на власта, АД МЕПСО доби нов Управен и Надзорен одбор, а за директор на државната компанија за пренос на електрична енергија беше назначен Бурим Љатифи од коалицијата „Вреди“.