Владиниот коалиционен партнер НДП е можно да ја прекине соработката со СДСМ и да ја напушти власта. Претседателот на НДП Весел Мемеди, кој е и потпретседател на Собранието најави дека денеска на прес-конференција ќе го соопшти нивниот официјален став по одлуката за разрешувањето на единствениот министер од нивните редови Сухејл Фазлиу. Првично, Мемеди најави прес-конференција во 11 часот претпладнево, па ја одложи за подоцна, чекајќи го епилогот од собраниската седница.
Уште вчера Мемеди побара од премиерот Заев да ја преиспита одлуката за смена на министерот за локална самоуправа, укажувајќи дека тие не биле консултирани за овој кадровски потег.
Собранието денеска по предлог на премиерот го разреши Фазлиу од функцијата министер за локална самоуправа.
Проблемите во коалицијата, медиумите ги поврзаа и со тоа што претставничка на НДП ја напуштила вчерашната седница на Советот на општина Гостивар. Претседателот на Советот, Насир Муслиу, за „360 Степени“ потврди дека советничката Луљета Азири си заминала, но тврди дека тоа не било политички потег.
„Еден советник од НДП не дојде бидејќи е надвор од државата. Една советничка од НДП си ја напушти седницата, но немаше проблем, секако привршувавме. Не можеше да се одржи вчерашната седница поради многу обврски што ги имаа повеќето советници. Тврдам дека немаше никаков проблем.“, вели Муслиу.
„360 Степени“ се обиде да исконтактира со советничката Азири, но таа не одговори на нашите повици.