Денеска се одржале разговори меѓу Москва и Киев, кои Лавров ги оцени како тапкање во место
Следните неколку недели би можеле да бидат одлучувачки за војната во Украина, изјави висок претставник на ЕУ, пренесе Ројтерс.
Неименуваниот официјален претставник изјавил за новинарите дека Русија најверојатно ќе ги зголеми своите воени напади во источна Украина.
„Ова не е бајка со неизбежен среќен крај. Мислам дека веројатно ќе видиме многу значително зголемување на интензитетот на руските воени напади на исток. Мислам дека следните неколку недели ќе бидат одлучувачки“,
ја пренесуваат изјавата странските медиуми.
Во меѓувреме Кремљ соопшти дека генералниот секретар на Обединетите нации во вторник во Москва ќе се сретне со рускиот претседател Владимир Путин.
Антонио Гутереш ќе има и работна средба и ручек со министерот за надворешни работи Сергеј Лавров.
Портпарол на шефот на ОН, Ери Канеко, рече дека Гутереш се надева дека ќе разговара за тоа што може да се направи за да се донесе мир во Украина.
Неговата канцеларија е во контакт и со украинската Влада за потенцијална посета со Зеленски, додаде Канеко.
Денеска се одржале разговори меѓу Москва и Киев, објави главниот руски преговарач, кој рече дека се работи за „неколку долги разговори“ со шефот на делегацијата на Украина.
Владимир Медински не даде детали за разговорите, туку општо одговори дека треба да доведат до преговори за прекин на огнот, јави Скај Њуз.
Досега се одржани неколку рунди мировни преговори меѓу Москва и Киев, но условите за прекин на огнот не се договорени.
Во меѓувреме, се огласи и шефот на руската дипломатија Сергеј Лавров, кој рече дека преговорите „тапкаат во место“.
„Тапкаат во место бидејќи сè уште нема одговор на предлогот што го испративме до украинските преговарачи пред пет дена, во кој ги зедовме предвид нивните коментари“,
рече Лавров на прес-конференција во Москва во друштво на казахстанскиот колега Мухтар Тлеуберди.
Лавров изрази сомнеж во подготвеноста на украинските лидери да продолжат со овие преговори.
„За мене е многу чудно да слушам изјави секој ден (…), дури и од (украинскиот) претседател и неговите советници, кои оставаат впечаток дека воопшто не им требаат преговори“,
рече Лавров.
Во меѓувреме, борбите продолжуваат на теренот, особено на исток и во големиот пристанишен град Мариупол на југоисток, каде што украинските бранители сè уште го држат под контрола огромниот металуршки комплекс „Азовстал“.