Разведени брачни другари ја користат пандемијата како изговор за да не дозволуваат видување на децата, посочуваат од Детската амбасада „Меѓаши“.
На СОС-телефонот на Детската амбасада „Меѓаши“ лани се регистрирани 240 јавувања, што е двојно повеќе од 2019 година и има тренд на зголемување. Во овие случаи, постои можно прекршување на едно или повеќе детски права за 426 деца.
Најголем дел од јавувањата или 27 отсто биле поврзани со семејни односи, односно оневозможување на детето да го гледа вториот родител, а останатите се жалби за насилство, пристапност до образование, здравствени или други права.
„27 отсто од јавувањата се поврзани со оневозможување на детето да го гледа вториот родител со изговор дека пандемијата го става детето во ризик, како вториот родител да е преносител ,а првиот родител да не е преносител и на тој начин нарушените врски не можат да станат функционални родителки обврски. Ова ни укажува дека треба да се спроведат дополнителни мерки и едукации на родителите при нивната разделба. Треба да им се обрне поголемо внимание и освестување за штетата што ја прават со нивната конфликтна меѓусебна комуникација, притоа не водејќи сметка за потребата на детето, природната потреба што ја има во себе да ги сака двајцата родители подеднакво; сè што ќе му се испречи на патот кон реализирање на таа потреба му прави огромна штета на детето“,
рече првиот човек на „Меѓаши“, Драги Змијанац.