Адвокатот Филип Медарски реагира на снимката која беше објавена денеска и тврди дека тој немал никаква поврзаност со компанијата „Дијаверум“, туку разговорот се однесувал на негова професионална ангажираност во Тотал ТВ.
„Се однесува на мојот професионален ангажман за компанијата Тотал ТВ, каде бев ангажиран од мнозинскиот сосопственик, а во врска со кривична пријава, поднесена од малцинскиот сосопственик. Ова не е прв, ниту единствен мој ангажман за оваа фирма, мојата соработка со неа датира години пред тоа. Спротивно на она што го тврди Антонио Милошоски, во мојот ангажман нема ништо спротивно на законите и професионалната етика. Заради тоа, тој ќе биде тужен за клевета и вистинитоста на своите тврдења ќе мора да ги докаже на суд“
, вели Медарски.
Тој тврди дека фирмата „Дијаверум“ му е позната само од медиумите и никогаш немал контакт со неа или било која друга компанија од областа на дијализата.
Претходно, на Јутјуб каналот „Раце лепливи“ беа објавени три нови аудио и уште една видеоснимка. На снимките се слуша гласот на поранешниот директор на Фондот за здравство Ден Дончев, кој поднесе оставка на почетокот на кризата со коронавирусот.
Во снимените материјали се спомнува и адвокатот Филип Медарски.