Со 1 200 случаи на заразени дневно во последните 24 часа Германија го забележа своето најголемо дневно зголемување на случаи на коронавирус за повеќе од три месеци.
Според министерот за здравство Јенс Шпан зголемувањето се должи, делумно, на луѓето кои се враќаат од одмори. Како една од најкритичните земји каде Германците го минуваат летниот одмор е Шпанија.
Министерството за надворешни работи во вторникот објави делумно предупредување за патувања во шпанската престолнина Мадрид и баскискиот регион, поради големен број на случаи со ковид. Вакви предупредувања веќе се издадени за регионите на Арагон, Каталонија и Навара.
Од почетокот на пандемијата, во Германија има повеќе од 9 000 смртни случаи како последица на коронавирусот.
Но, со пораст на бројот на заразени се соочуваат и другите европски земји.
„Критичен момент“ за Шпанија
Шпанија, која з време на појавата на пандемијата беше една од најтешко погодените европски земји, повторно се соочува со најлоша стапка на заразани во Западна Европа. Во својата последна дневна пресметка во вторникот регистрирани се 1 418 нови заразени.
Салвадор Мекип, експерт за здравствени науки на Универзитетот во Каталонија, за новинската агенција АФП изјави дека земјата се наоѓа во „критичен момент“.
„Се наоѓаме во момент кога работите може или да станат подобри или да се влошат. Ова значи дека треба да ги отстранме сите препреки за да ја ставиме под контрола ситуацијата пред нештата да станат посериозни“, вели тој.
Шпанија од почетокот на пандемијата има регистрирано повеќе од 326 000 случаи на ковид- што е најголем број во Западна Европа и е на 11. место во светот.
Задолжително носење маски во Брисел
Од денеска носењето маска за лице стана задолжително на сите јавни места во Брисел, што се должи на пораст на случаите со ковид.
Наредбата важи за сите над 12 годишна возраст и се однесува на сите јавни места, и парковите и улиците. Досега маските беа задолжителни на јавни места каде имаше гужви и во затворени објекти, како трговските центри.
Според властите, мерките се воведуваат поради зголемувањето на бројот на заразените, при што Брисел бележи просек од 50 нови случаи на 100 000 жители дневно во текот на изминатата недела.
За да се обезбеди дека новите правила се почитуваат воведени се полициски контроли.
Регулативата за носење маски во Брисел е една од најстрогите моментално воспоставени во Европа.
Белгија досега регистрира повеќе од 75 000 случаи со коронавирус и повеќе од 9 800 смртни случаи, според податоците од Универзитетот Џон Хопкинс.
Париз го откажа презакажаниот маратон
Франција го откажа овогодишниот маратон во Париз закажан за 15 ноември поради состојбата со коронавирусот, соопштија организаторите денеска.
Маратонот првично требаше да се одржи на 5 април, но потоа беше одложен за ноември.
Организаторите велат дека „направиле сè за да се одржи настанот“, но чувствуваат одговорност да го откажат. Нивните напори сега се насочени кон организација на маратонот во 2021 година.
Најавата се случи откако Париз стана последниот француски град што воведе задолжително користење на маските за лице на отворено, бидејќи претходно тоа беше обрска само во затворени простории.
Портпаролот на француската влада денеска изјави дека Франција постепено ќе ги засилува полициските проверки за да се осигура дека се почитуваат физичкото растојание и се носат маски.
„Се наоѓаме во исклучителен момент, мора да ги мобилизираме полициските сили за да ршиме проверки“, рече Габриел Атал на прес-конференцијата денеска.
Досега во светот, според сајтот Ворлдометерс, 20 585 207 лица заболеа со ковид, од кои 747 003 починаа.
Активни се 6 346 704, од кои 99% се со лесни симптоми, а само 1 процент се во сериозна или критична здраствена состојба.
САД и натаму се на врвот на листата по заразени со 5 309 622 и 167 789 починати, по што следуваат Бразил со 3 112 393 заразени и 103 099 починати.
Од Европа на прво место е Русија со 902 701 заразени и 15 260 починати.