Ние сакаме да избегнеме преговарачкиот процес со ЕУ да се претвори во билатерален, но свесни сме дека е задача на Европската комисија и земјите-членки како ќе ја обликуваат таа рамка без процесот да биде доведен во ќорсокак на самиот почеток, вели вицепремиерот
Вицепремиерот за европски прашања, смета дека е добро што целиот спор со Бугарија е сведен на неколку клучни прашања, како што е тоа со статусот на Бугарите во Северна Македонија, а она што е важно за нашата страна, според него, е да има сеопфатен документ.
„Повеќе страни се аспектите на спорот. Едниот е во овој дел на тие четири точки или ’четири плус еден плус еден‘, околу позицијата на Бугарите или бугарската етничка заедница во Северна Македонија и мислам дека тоа сега е клучно прашање, и претседателот Радев го отвори. За нас е добро што целиот спор се сведе на неколку клучни прашања затоа што претходно долго време имавме проблем да сфатиме што точно Бугарија очекува, сака или која всушност е пречката“,
рече Маричиќ вечерва во емисијата „Клик плус“ на ТВ21.
Во сеопфатниот документ вели тој, би биле дефинирани правата и обврските на двете страни односно да се знае што точно од она кое е договорено билатерално ќе се мониторира во преговарачкиот процес со ЕУ, а што не. Не смее, вели Маричиќ, да се дозволи преговорите со ЕУ да се претворат во билатерални.
„Не можам да зборувам за Бугарија, но она што нас ни е важно е да имаме еден сеопфатен документ кој ќе ги утврди јасно правата и обврските на двете страни, ќе ги дефинира темите на кои треба да се прават чекори од наша и од бугарска страна, редоследно временски ќе ги утврди чекорите до подигање и по подигање на ветото и ќе ни даде определена предвидливост во преговарачкиот процес со ЕУ во делот на Бугарија. Тоа значи да знаеме што точно од тоа што е договорено како билатерално во таков некој сеопфатен документ на кој начин би се мониторирало во процесот на преговори со ЕУ, а што не може да биде и што не смее да биде таму зошто нема основа со цел да не се претвори тој процес во билатерален процес. Ние тоа сакаме да го избегнеме и да не навлеземе во тоа, но свесни сме дека тоа е задача на Европската комисија и земјите-членки како ќе ја обликуваат таа рамка без процесот да биде доведен во ќорсокак на самиот почеток“,
рече Маричиќ.
Вицепремиерот кажа и дека по формирањето на новата влада, изминатите 120 дена се работело на менување на сликата и енергијата, меѓутоа по настанот во Битола каде беше отворен клуб „Ванчо Михајлов“, на кој присуствуваше и бугарскиот премиер Кирил Петков, разговорите на некој начин стагнирале.
Од вчерашната средба во Рим помеѓу премиерите Кирил Петков и Димитар Ковачевски, како што кажа, нема ништо ново туку охрабрување од нив да продолжат разговорите на ниво на министерствата за надворешни работи.