Новиот вицепремиер за европски прашања денеска на прес-конференцијата со германската министерка за Европа Лирман рече дека останува праксата на немешање во внатрешните работи на други држави
Изјаснувањето и дефинирањето на тоа каква етничка заедница егзистира во која било држава во регионот во овој момент не би било продуктивно. Ние се водиме од европските принципи и практики и така ќе остане. Тоа е наша уставна обврска, изјави денеска вицепремиерот за европски прашања Бојан Маричиќ одговарајќи на новинарско прашање на првата прес-конференција на оваа функција, која ја имаше со германската министерка за Европа Ана Лирман.
„Најпрво мислам и досега имавме пракса на немешање во внатрешните прашања на која било нашата соседна држава, а тоа е обврска од Уставот. Не е на Северна Македонија да кажува каде какво како малцинство има во некоја држава во регионот. Тоа е внатрешно прашање на сите држави, вклучувајќи ја и Бугарија. Секоја група луѓе или етничка заедница или политичка партија или здружение има право да си ги бара своите правата преку Советот на Европа, Европскиот суд за човекови права и преку Европската конвенција за заштита на човековите права. Во таа смисла изјаснувањето и дефинирањето на тоа каква етничка заедница егзистира во која било држава во регионот во овој момент не би било продуктивно. Ние се водиме од европските принципи и практики и така ќе остане. Тоа е наша уставна обврска“,
рече Маричиќ.
Бугарскиот премиер Кирил Петков, кој утре доаѓа во земјава, во интервју за БТВ рече дека ниту тој ниту други претставници на владата не разговарале со претставници на Амбасадата на САД во Бугарија за признавање на македонско малцинство во земјата. На ваквото прашање на новинарката тој одговори – „Никогаш.“
„Нема такво малцинство и за такво малцинство не може да се зборува“,
рече Петков.