Вицепремиерот за европски прашања, во врска со исвиркувањето на водителката во моментот кога почна да зборува на македонскиот јазик на прославата за годишнината од потпишувањето на Рамковниот договор, за Дојче веле вели дека провокации и обиди за дестабилизација секогаш ќе има, но за разлика од пред пет години, денес тие ниту се иницирани ниту се поддржани од кој било чинител од власта
Во саботата вечерта на плоштадот „Секндербег“ во Скопје се одржа „Мировен фестивал“ по повод 21 година од потпишувањето на Охридскиот рамковен договор, меѓутоа, забавата организирана од министерот за политички систем и односи меѓу заедниците Артан Груби почна со исвиркување на водителката кога се обиде најавата на прославата да ја прочита и на македонски јазик откако тоа го стори на албански.
Груби претходно фестивалот го најави како нешто што ќе прерасне во еден од најголемите регионални, мултикултурни и обединувачки фестивали, но „обединувачкиот карактер“ се изгуби под налетот на гласни свирежи и негодувања на присутните штом водителката почна да чита најава на македонски јазик, пишува Дојче веле.
Вицепремиерот за европски прашања Бојан Маричиќ во врска со настанот вели дека провокации и обиди за дестабилизација имало и секогаш ќе има, но за разлика од пред пет години, денес тие ниту се иницирани, ниту се провоцирани, ниту се поддржани од кој било чинител од власта.
„Провокации и обиди за дестабилизација имало и секогаш ќе има, но за разлика од пред пет години, денес тие ниту се иницирани ниту се провоцирани ниту се поддржани од кој било чинител од власта. Ние сигурно чекориме кон ЕУ, разумно, одлучно, со почит кон нам различните и во договор со нашите сограѓани, пријатели, другарки и другари, припадници на сите етникуми во нашата земја, дека нашиот пат напред е еден и заеднички. Со заемна поддршка ќе ги надминеме сите предизвици на овој пат, амбициозно и без застанување кон остварување на полноправното членство во Унијата“,
вели за Дојче веле вицепремиерот за европски прашања.
Маричиќ вели дека Охридскиот рамковен договор веќе цели две децении е основа на меѓуетничката стабилност и меѓусебното почитување
„Денес живееме во мултиетничката и мултикултурна модерна демократија, единство и солидарност, во која заеднички ги поставивме и основите за справување со политичките предизвици со кои се соочувавме и по патот на нашата надворешна интеграција, како единствен модел за надминување на разлики, прифаќање и градење заедничка иднина. Благодарение на тоа прераснавме во општество и држава во кои албански политичари и граѓани го бранат и чуваат македонскиот јазик и идентитет како свои, но и обратно, македонски политичари поддржуваат права на своите сограѓани Албанци, меѓу кои е и правото да говорат и да се образоваат на својот мајчин јазик“,
вели Маричиќ.
Дојче веле потсетува дека таква одбрана, односно извинување и осуда на исвиркувањето на македонскиот јазик, до вчера не стигнала ниту од организаторот – Министерството за политички систем и односи меѓу заедниците ниту, пак, од Владата.