Маричиќ вели дека Северна Македонија се наоѓа пред нова уставна промена, во период од пет години, поради истите причини и дека не е лесно да се замисли колку сето ова е потешко денес, за разлика од претходно
Вицепремиерот за европски прашања Бојан Маричиќ смета дека новата методологија на преговори дава можност за забрзано пристапување во Европската Унија и дека 2030 година е реална шанса. Тој денеска говореше на завршната сесија на Форумот на граѓанското општество, кој се одржува во Тирана, на тема „Отклучување на напредокот: Европска иднина на Западен Балкан“.
„Внимателно ги следев говорите на сите политичари на различни форуми и можам да кажам дека циркулира значителна содржина во врска со проширувањето на ЕУ. Верувам дека ова е суштинска промена што треба да ја пофалиме како земји кандидати. Можам да ви кажам дека будно го набљудувам процесот на пристапување, особено новата методологија што е иницирана и тестирана во Северна Македонија и Албанија. Процесот веќе претрпе промени и реформи. Во изминатите неколку месеци имаше различни политички пораки кои се поинакви од она што долго време го слушавме. Г-дин Рот ја спомена можноста од 2030 година како потенцијален датум за идно пристапување. Сите овие точки што ги спомна г-дин Рот се добредојдени и верувам дека треба да ги земеме предвид. Иако не сите од нив можеби се реални денес, од суштинско значење е да се земат предвид и да се истражат како потенцијални компромиси“,
кажа Маричиќ на завршната сесија на Форумот на граѓанското општество.
Тој истакна и дека не смее веќе да има вета на почеток на преговорите.
„Би сакал особено да го прокоментирам прашањето околу вето, бидејќи Северна Македонија ја научи лекцијата на потешкиот начин. Мислам дека не е реално да се претпоставува дека сè во процесот на пристапување ќе се реши со мнозинство гласови. Сепак, би сакал да видам, во најмала рака, единствено право на вето на земјите членки на крајот на процесот, а не на почетокот. Кога една земја поминува низ овој сложен и предизвикувачки процес на усогласување на нејзиниот систем со ЕУ, станува многу полесно да се решат прашањата и да се добие одобрение од земјите членки на крајот од процесот. Полесно е да им го претставите како позитивно решение на вашите граѓани кога сте поблиску до целта“,
вели Маричиќ.
Тој додаде дека Северна Македонија се наоѓа пред нова уставна промена, во период од пет години, поради истите причини и дека не е лесно да се замисли колку сето ова е потешко денес, за разлика од пред 5 години.
„Основното прашање е помалку комплицирано од она со кое се соочувавме пред пет години, но апетитот и на граѓаните и на политичарите за вакви билатерални прашања е прилично низок. Затоа се стремиме билатералните прашања да се задржат колку што е можно подалеку од Преговарачката рамка. Јас нема да истражувам во детали; претпочитам да се фокусирам на поголемата слика, бидејќи тоа е поважно“,
рече Маричиќ.