Лидерите во САД ги набљудуваат изборите што ќе бидат направени тука во следните неколку месеци и се надеваат дека вашата одлука ќе биде усогласена со нашите безбедносни мерки преку НАТО и ќе биде усогласена со слична одлука да се остане на патот кон ЕУ, порача американскиот сенатор Крис Марфи за време на денешната посета на Скопје
Премиерот Димитар Ковачевски се согласи дека на земјава ѝ претстои пат со тешки и храбри одлуки во поглед на нејзината интеграција во ЕУ, но изрази задоволство што на тој пат С Македонија ја има поддршката од САД
САД ја поддржуваат Северна Македонија во одлуката за приклучување кон Европската Унија, но за земјата да може да го овозможи ова проширување, мора да ги преземе потребните чекори и да ги спроведе техничките измени во Уставот, кои се јасна можност за приклучување кон ЕУ.
Ова од прес-центарот на македонската Влада денеска го изјави американскиот сенатор Крис Марфи, кој нагласи дека земјава не смее да ја пропушти понудената можност за приклучување кон Унијата.
„Знам, навистина знам дека беше долг патот кон ЕУ. Знам и дека многумина го поставуваат прашањето дали ЕУ е вистинската можност. Тука сум да ви кажам дека е. Многу луѓе го кажуваа истото и за НАТО – дека С Македонија никогаш нема да добие покана од НАТО. Но, вие ги преземавте потребните тешки чекори за да ја овозможите таа покана – потпишавте историски договор којшто ја овозможи таа покана. Денес С Македонија е членка на НАТО-алијансата. А, сега има слични чекори кои треба да бидат преземени со цел да се приклучите кон ЕУ“,
изјави сенаторот Марфи за време на прес-конференцијата со премиерот Димитар Ковачевски.
Ако Северна Македонија, сепак, одлучи да тргне по другиот пат и да се одлучи против уставните измени, тогаш, рече Марфи, тоа ќе биде многу загрижувачки чекор за една членка на НАТО.
„Ние сме пријатели и никогаш нема да престанеме да бидеме пријатели и партнери, но лидерите во САД ги набљудуваат изборите што ќе бидат направени тука во следните неколку месеци и сите се надеваат дека вашата одлука ќе биде усогласена со нашите безбедносни мерки преку НАТО и ќе биде усогласена со слична одлука да се остане на патот кон ЕУ“,
додаде Марфи.
Во време на руската инвазија на Украина, додаде тој, Европа ја освести потребата да ги остави вратите отворени и затоа ова е моментот за демократиите да се обединат да ги донесат тешките одлуки за да возвратат на агресијата.
Премиерот Димитар Ковачевски се согласи дека на земјава ѝ претстои пат со тешки и храбри одлуки во поглед на нејзината интеграција во ЕУ, но изрази задоволство што на тој пат С Македонија ја има поддршката од САД.
Одлуката што е пред нас, нагласи Ковачевски, не е одлука на еден човек, на една влада или на една политичка партија туку одлука на сите политички актери во државата.
„Нашата држава потекнува од поранешната југословенска федерација. Во тоа време имавме поголем стандард и од Словачка и од Чешка, Романија, Полска, Бугарија и од сите други земји кои станаа земји членки на ЕУ. Јас ќе ги донесам и ќе ги предводам сите потребни одлуки кои ќе обезбедат граѓаните на Северна Македонија повторно да имаат поголем стандард од сите граѓаните од кои порано сме имале поголем стандард бидејќи нашите граѓани го заслужуваат тоа. На тој пат сметам и на поддршката на нашите стратешки партнери, пред сè САД и земјите членки на ЕУ“,
изјави премиерот.
На средбата меѓу премиерот Ковачевски и американскиот сенатор Марфи, освен евроинтегративниот пат на земјава и членството во НАТО, во фокус на разговорите биле и билатералните односи меѓу С Македонија и САД, како и реформите во областа на владеењето на правото и борбата против корупцијата.